Avtomototransport vositasini sotish, ayirboshlash yoki hadya qilish

Shartnomani notarial tasdiqlash

Avtomototransport vositasini boshqa shaxsga:

sotish;
ayirboshlash;
hadya qilish;
boshqa fuqarolik-huquqiy bitim asosida o‘tkazish shartnomasi, qonunchilikda istisno nazarda tutilmagan bo‘lsa, notarial tasdiqlanadi.

Notarius taraflarning shaxsi, muomala layoqati va haqiqiy xohish-irodasini aniqlaydi, transport vositasiga bo‘lgan huquq hamda uni tasarruf etishga to‘sqinlik qiluvchi holatlarni tekshiradi.

Asosiy hujjatlar va ma’lumotlar

Taraflardan quyidagilar talab qilinishi mumkin:

pasport, ID-karta yoki boshqa amal qiluvchi shaxsni tasdiqlovchi hujjat;
transport vositasini ro‘yxatdan o‘tkazish guvohnomasi;
vakil ishtirok etsa, tegishli ishonchnoma;
transport garovda bo‘lsa, garovga oluvchining roziligi;
transport umumiy er-xotin mulki bo‘lsa, ikkinchi tomonning notarial roziligi;
voyaga etmagan yoki vasiylikdagi shaxs manfaatiga daxl qilinsa, vasiylik va homiylik organining ruxsati;
imtiyozli davlat boji qo‘llanilishi uchun qarindoshlikni tasdiqlovchi ma’lumot.

Mulk huquqi, taqiq, xatlov, garov, nikoh holati va ijro qarzdorligi haqidagi ma’lumotlarning asosiy qismi notarius tomonidan elektron tizimlar orqali tekshiriladi.

Er yoki xotinning roziligi

Nikoh davomida umumiy mablag‘lar hisobidan olingan transport vositasini boshqa shaxsga o‘tkazishda ikkinchi turmush o‘rtoqning notarial tasdiqlangan roziligi talab etiladi.

Transport nikohgacha olingan, meros yoki hadya tariqasida kelib tushgan yoxud er-xotinning alohida mulki ekanligi boshqa qonuniy hujjat bilan tasdiqlangan bo‘lsa, bunday rozilik talab etilmaydi.

Davlat boji

«Davlat boji to‘g‘risida»gi Qonunga ko‘ra:

avtomototransport vositasini boshqa shaxsga o‘tkazish shartnomasi uchun — 3 BHM;
bitta mototransport, motoaravacha yoki motoqayiq uchun — BHMning 25 foizi;
yaqin qarindoshga o‘tkazishda — belgilangan stavkaning 5 foizi;
bank krediti hisobidan sotib olishda — belgilangan stavkaning 10 foizi undiriladi.

Ayirboshlash shartnomasida davlat boji faqat bitta transport vositasi uchun undiriladi. Huquqiy va texnik xizmatlar uchun qo‘shimcha to‘lovlar bo‘lishi mumkin.

Qayta ro‘yxatdan o‘tkazish

Muhim: notarial tasdiqlangan shartnoma transport vositasi avtomatik ravishda xaridor nomiga to‘liq qayta ro‘yxatdan o‘tdi, degani emas.

Transport vositasi shartnoma notarial tasdiqlangan paytdan boshlab o‘n kun mobaynida Ichki ishlar vazirligining Yo‘l harakati xavfsizligi xizmati organlarida ro‘yxatdan o‘tkazilishi kerak. Bu talabni bajarmaslik qonunchilikda belgilangan javobgarlikka sabab bo‘lishi mumkin.

Bitimni tasdiqlash tartibi Vazirlar Mahkamasining 726-son qarori bilan belgilangan.

Maqola foydali bo‘ldimi?

Bo‘limlar