Prezident maktablarining maqomi

Prezident maktablari Maktabgacha va maktab ta’limi vazirligi huzuridagi Ixtisoslashtirilgan ta’lim muassasalari agentligi tizimidagi davlat umumiy o‘rta ta’lim muassasalari hisoblanadi.

Prezident maktablarida o‘quvchilarga bepul umumiy o‘rta ta’lim beriladi. Maktablarning asosiy maqsadi iqtidorli bolalarni aniqlash, ularga ilg‘or ta’lim texnologiyalari asosida ta’lim berish va kelgusida mamlakat taraqqiyotiga hissa qo‘sha oladigan yuqori malakali kadrlarni tayyorlashdan iborat.

Prezident maktablarining asosiy vazifalari

Prezident maktablarining asosiy vazifalari quyidagilardan iborat:

— iqtidorli o‘quvchilarni aniqlash, tanlash va o‘qitish;

— tabiiy va aniq fanlar, muhandislik, axborot texnologiyalari hamda xorijiy tillarni chuqur o‘rgatish;

— o‘quvchilarning tanqidiy va ijodiy fikrlash, muammolarni hal qilish hamda jamoada ishlash qobiliyatlarini rivojlantirish;

— o‘quv jarayonida zamonaviy pedagogik va axborot texnologiyalarini qo‘llash;

— milliy ta’lim standartlarini xalqaro ta’lim dasturlari bilan uyg‘unlashtirish;

— o‘quvchilarni mahalliy va xorijiy oliy ta’lim tashkilotlarida o‘qishga tayyorlash.

Prezident maktablari bitiruvchilariga davlat namunasidagi ta’lim hujjati bilan bir qatorda tegishli xalqaro ta’lim dasturlari bo‘yicha diplom yoki sertifikatlar berilishi mumkin.

Qabul kvotasi

Har bir Prezident maktabiga bir o‘quv yilida 24 nafar o‘quvchi qabul qilinadi. Ular har birida 12 nafardan o‘quvchi bo‘lgan ikkita sinfga taqsimlanadi.

Qabul tenglik, ochiqlik, xolislik va shaffoflik printsiplari asosida o‘tkaziladi. Imtihon natijalari bo‘yicha eng yuqori ball to‘plagan nomzodlar belgilangan kvota doirasida qabul qilinadi.

Qabul kvotasi — ta’lim muassasasiga bir o‘quv yilida qabul qilinishi mumkin bo‘lgan o‘quvchilarning belgilangan eng ko‘p soni.

Prezident maktabiga kimlar hujjat topshirishi mumkin

Prezident maktabiga umumiy o‘rta ta’lim muassasasining 4-sinfini tamomlagan, matematika va tabiiy fanlardan yillik baholari a’lo bo‘lgan o‘quvchilar hujjat topshirishi mumkin.

Nomzod o‘zi o‘qiyotgan maktab joylashgan hududdagi Prezident maktabiga hujjat topshiradi.

Xorijda ta’lim olayotgan O‘zbekiston fuqarolari ota-onasi yoki qonuniy vakilining doimiy yashash joyi bo‘yicha hujjat topshirishi mumkin. Bunda o‘quvchining baholari ko‘rsatilgan hujjat o‘zbek tiliga tarjima qilinib, notarial tasdiqlangan bo‘lishi kerak.

O‘zbekistonda doimiy yashovchi fuqaroligi bo‘lmagan shaxslarning farzandlari O‘zbekiston fuqarolari bilan teng tartibda ishtirok etadi. Chet el fuqarolarining farzandlari esa qonunchilikda nazarda tutilgan hollardan tashqari kirish imtihonlarida ishtirok etmaydi.

Nomzod — Prezident maktabiga qabul qilish uchun hujjat topshirgan o‘quvchi.

Qonuniy vakil — bolaning ota-onasi, farzandlikka oluvchisi, vasiysi yoki homiysi.

Hujjatlarni topshirish

Qabul muddatlari har yili maxsus komissiya tomonidan belgilanadi. Hujjatlarni qabul qilish boshlanishidan kamida 10 kalendarь kun oldin qabul muddatlari, imtihon o‘tkaziladigan joylar va boshqa zarur ma’lumotlar rasmiy veb-saytlarda e’lon qilinadi.

Hujjatlar elektron shaklda topshiriladi. Quyidagilar talab etiladi:

— o‘quvchining matematika va tabiiy fanlar bo‘yicha yillik baholari ko‘rsatilgan, maktab direktori tomonidan tasdiqlangan tabelь nusxasi;

— oxirgi ikki oy ichida olingan fotosurat;

— tug‘ilganlik haqidagi guvohnoma ma’lumotlari;

— ota-ona yoki qonuniy vakilning shaxsini tasdiqlovchi hujjati va bog‘lanish ma’lumotlari.

Nomzod hujjat topshirish vaqtida Prezident maktabidan tashqari qo‘shimcha ravishda o‘zi o‘qiyotgan hududdagi bitta ixtisoslashtirilgan maktabni tanlashi mumkin.

Kirish imtihonlari

Kirish imtihonlari har yili maxsus komissiya belgilagan muddatlarda ikki bosqichda o‘tkaziladi. Nomzod imtihonni davlat tilida, qoraqalpoq tilida yoki o‘z tanloviga ko‘ra ingliz tilida topshirishi mumkin.

Birinchi bosqichda matematika fanidan 30 ta test topshirig‘i beriladi:

— 10 ta oson darajadagi;

— 10 ta o‘rta darajadagi;

— 10 ta murakkab darajadagi topshiriq.

Birinchi bosqich natijalariga ko‘ra har bir o‘rin uchun eng yuqori natija ko‘rsatgan 20 nafar nomzod, jami 480 nafar o‘quvchi ikkinchi bosqichga o‘tkaziladi.

Ikkinchi bosqichda quyidagi topshiriqlar bajariladi:

— matematikadan tanqidiy fikrlash va muammoni hal qilishga qaratilgan 40 ta topshiriq;

— ingliz tili grammatikasi va matnni tushunish bo‘yicha 40 ta topshiriq.

Qabul jarayonida nomzodlarga hech qanday imtiyoz berilmaydi.

Kirish imtihoni — nomzodning bilim, mantiqiy fikrlash va tegishli ko‘nikmalarini baholash uchun o‘tkaziladigan sinov.

Imtihonga kirish va natijalar

Imtihonga kirish ruxsatnomasi imtihon sanasidan kamida 3 kun oldin nomzodning shaxsiy kabinetiga joylashtiriladi.

Imtihon vaqtida telefon, aqlli soat, kalьkulyator, kitob, lug‘at, shpargalka va boshqa yordamchi vositalardan foydalanish taqiqlanadi. Qoidani buzgan nomzod imtihondan chetlashtiriladi.

Uzrli yoki uzrsiz sabablarga ko‘ra imtihonga kelmagan nomzodlar uchun qo‘shimcha imtihon o‘tkazilmaydi.

Birinchi bosqich natijalari imtihon o‘tkazilgan kundan boshlab 20 kun ichida, ikkinchi bosqich natijalari esa 30 kun ichida e’lon qilinadi. Imtihon materiallarini nomzodlarga ko‘rsatish yoki qayta tekshirish nazarda tutilmagan.