Ayrim toifadagi shaxslarga kommunal xizmatlar uchun oylik kompensatsiya

Kompensatsiya oluvchi shaxslar

Quyidagi toifalarga Davlat byudjeti mablag‘lari hisobidan kommunal xizmatlar uchun har oylik kompensatsiya tayinlanadi:

1941–1945-yillardagi urush oqibatida nogironligi bo‘lgan shaxslar va urush qatnashchilari;
urush davridagi mehnat fronti qatnashchilari;
urush qatnashchilari va urush oqibatida nogironligi bo‘lgan shaxslarga tenglashtirilgan shaxslar;
Sovet Ittifoqi Qahramonlari;
Sotsialistik Mehnat Qahramonlari va «Slava» ordenining uchala darajasi bilan mukofotlangan shaxslar;
fashist kontslagerlarining sobiq voyaga etmagan mahbuslari;
Leningrad shahri qamali davrida ishlagan shaxslar;
ko‘rish qobiliyati bo‘yicha I guruh nogironligi bo‘lgan shaxslar;
Chernobilь halokati oqibatida jabrlangan shaxslar;
yadro poligonlari va boshqa radiatsiya-yadro ob’ektlarida harbiy xizmat o‘tagan shaxslar.

Kompensatsiya miqdori

Kompensatsiya pensiyani hisoblashning bazaviy miqdoriga nisbatan belgilanadi:

urush oqibatida nogironligi bo‘lgan shaxslar va urush qatnashchilariga — 50 foiz;
urush davridagi mehnat fronti qatnashchilariga — 25 foiz;
qolgan yuqoridagi toifalarga — 45 foiz.

Bir shaxs bir nechta asos bo‘yicha kompensatsiya olish huquqiga ega bo‘lsa, uning tanloviga ko‘ra eng yuqori miqdordagi bitta kompensatsiya tayinlanadi.

Kompensatsiya jismoniy shaxsning jami daromadi tarkibiga kiritilmaydi va pensiya yoki nafaqa to‘lanadigan tartib hamda muddatlarda to‘lanadi.

Tayinlash tartibi

Urush bilan bog‘liq toifalar, qahramonlar, kontslagerь mahbuslari, Leningrad qamali ishtirokchilari va Chernobilь halokatidan jabrlangan shaxslar kompensatsiya tayinlash uchun Pensiya jamg‘armasi bo‘limiga ariza bilan murojaat qiladi.

Ko‘rish qobiliyati bo‘yicha I guruh nogironligi bo‘lgan shaxslarga va yadro poligonlari hamda boshqa radiatsiya-yadro ob’ektlarida xizmat o‘tagan shaxslarga kompensatsiya axborot tizimlaridagi ma’lumotlar asosida proaktiv shaklda tayinlanadi.

Ariza asosida tayinlanganda kompensatsiya murojaat qilingan sanadan keyingi oyning birinchi sanasidan boshlab to‘lanadi. Proaktiv tayinlashda ham huquqni tasdiqlovchi ma’lumot axborot tizimiga kelib tushgan sanadan keyingi oyning birinchi sanasi asos qilinadi.

Muhim: 2175-son bilan ro‘yxatdan o‘tkazilgan avvalgi idoraviy nizom 2026-yil 20 yanvardan kuchini yo‘qotgan. Biroq kompensatsiyaning o‘zi bekor qilinmagan — uni tayinlash tartibi amaldagi pensiya qoidalariga o‘tkazilgan.

Amaldagi tartib Vazirlar Mahkamasining 2022-yil 13-oktabrdagi 592-son qarori bilan belgilangan. Eski nizomning bekor qilingani 2175-9-son buyruqda ko‘rsatilgan.

Maqola foydali bo‘ldimi?

Bo‘limlar