“Ayollar daftari” jamg‘armasi hisobidan maqsadli ijtimoiy yordamlar

Maqsadli ijtimoiy yordam nima?

Maqsadli ijtimoiy yordam — xotin-qizning aniq muammosi va individual dasturi asosida belgilangan maqsad uchun ajratiladigan mablag‘, tovar, ish yoki xizmat.

«Ayollar daftari» jamg‘armasi mablag‘lari Ijtimoiy reestrga kiritilgan oilalarning 30 yoshdan oshgan xotin-qizlariga individual reja asosida, boshqa belgilangan hollarda esa «mahalla ettiligi» tasdiqlagan individual dastur va Vasiylik kengashi qaroriga muvofiq sarflanadi.

Qanday yordam turlari mavjud?

Jamg‘arma hisobidan, jumladan:

xotin-qizlar bandligi va ijtimoiy faolligiga qaratilgan loyihaga 60 BHMgacha grant;
oliy ta’lim to‘lov-kontraktining 50 foizini, biroq 50 BHMdan oshmagan qismini qoplash;
jarrohlik amaliyotisiz davolanish uchun 50 BHMgacha, jarrohlik uchun davlat tibbiy sug‘urtasida belgilangan bazaviy narx doirasida mablag‘;
turar joy ijarasining 50 foizini, biroq har oy 2 BHMgacha, Toshkent, Nukus va viloyat markazlarida 3 BHMgacha qoplash;
uy-joyni ta’mirlash uchun 50 BHMgacha bir martalik yordam;
psixologik xizmatlar va muayyan huquqiy xarajatlarni qoplash nazarda tutilgan.

Yordam kimlarga beriladi?

Har bir yordamning alohida mezoni mavjud. Masalan, kontrakt va ayrim tibbiy yordamlar Ijtimoiy reestrdagi oilalarning 30 yoshdan oshgan xotin-qizlariga, uy-joy ta’miri esa Ijtimoiy reestrdagi yoki har bir oila a’zosiga daromadi minimal iste’mol xarajatlarining 2 baravarigacha bo‘lgan oilalarning 30 yoshdan oshgan xotin-qizlariga berilishi mumkin.

«Ayollar daftari»ga kiritilganlik barcha yordam turlarini avtomatik olish huquqini bermaydi. Yordam oluvchi tegishli pasportda ko‘rsatilgan yosh, daromad, Ijtimoiy reestr, ta’lim, tibbiy yoki uy-joy mezonlariga javob berishi kerak.

Yordam naqd pulda beriladimi?

Yordam shakli uning turiga bog‘liq. Ko‘p hollarda mablag‘ xotin-qizning qo‘liga naqd berilmaydi:

kontrakt puli ta’lim tashkilotiga;
davolanish mablag‘i Davlat tibbiy sug‘urtasi jamg‘armasi yoki tibbiyot tashkilotiga;
ijara kompensatsiyasi shartnoma asosida;
qurilish materiallari va ta’mir xarajati etkazib beruvchiga;
huquqiy yoki psixologik xizmat haqi xizmat ko‘rsatuvchiga o‘tkaziladi.

Qanday murojaat qilinadi?

Xotin-qiz ehtiyojini «mahalla ettiligi»ga, xotin-qizlar faoliga yoki «Ayollar daftari» axborot tizimi orqali ma’lum qiladi. Muammo o‘rganilib, daftarga kiritish va individual dasturni tasdiqlash masalasi hal etiladi.

Jamg‘arma mablag‘i hisobidan yordam ko‘rsatish haqidagi murojaat ishchi organ tomonidan ko‘rib chiqish uchun Vasiylik kengashiga taqdim etiladi. Qabul qilingan qaror murojaatchiga «mahalla ettiligi» orqali etkaziladi.

Yordam takroran berilishi mumkinmi?

Davriylik yordam turiga qarab farq qiladi. Masalan, ijtimoiy loyiha granti va davolanish yordami bir yilda bir marta, uy-joy ta’miri va kontrakt to‘lovi esa belgilangan shartlar asosida bir marta beriladi.