Nuroniy va keksalarni qo‘llab-quvvatlash

Keksalarga qanday ijtimoiy yordamlar ko‘rsatiladi?

«Nuroniy» jamg‘armasi mablag‘lari hisobidan ayrim toifadagi keksalar uchun qo‘llab-quvvatlash choralari belgilangan.

O‘zgalar parvarishiga muhtoj bo‘lgan yolg‘iz va yolg‘iz yashaydigan keksalar har yili bir marta sanatoriylarda bepul sog‘lomlashtiriladi.

Sharoiti og‘ir va kam ta’minlangan keksalarga shifokor retsepti asosida:

3 oylik ehtiyojdan kelib chiqib dori vositalari;
tibbiy va maxsus protez-ortopediya moslamalari;
zarur jarrohlik amaliyoti xarajatlarini qoplash kabi yordamlar ko‘rsatilishi mumkin.

Og‘ir tashxisli kasalligi yoki nogironligi bo‘lgan keksalar uchun shifokor retseptiga muvofiq 3 oylik ehtiyojdan kelib chiqib dori vositalari qiymatining 50 foizigacha kompensatsiya qilish nazarda tutilgan.

Sport va madaniy tadbirlar uchun qanday yordam bor?

Keksalarning sport muassasalarida jismoniy tarbiya va sport bilan shug‘ullanishi uchun abonement xarajatlari qoplanishi mumkin.

Bunda bir oylik abonement xarajati 2 BHMdan oshmasligi kerak. Davlat teatrlari va muzeylariga keksalar uchun chipta narxini to‘liq qoplab berish ham nazarda tutilgan.

Faol nuroniylar oilalarga qanday ko‘maklashadi?

Mahallalarda katta hayotiy tajribaga va aholi o‘rtasida obro‘-e’tiborga ega faol nuroniylarni oilalar bilan manzilli ishlashga jalb etish tizimi joriy etilgan.

Faol nuroniylar, jumladan:

xonadon tomorqasidan samarali foydalanishga;
daromad manbalarini ko‘paytirishga;
oila farzandlarini hunarmand va ustalarga shogirdlikka biriktirishga;
bolalarning o‘quv jihozlari va sport kiyimlari bilan ta’minlanishiga;
oilaning ijtimoiy shartnomadagi majburiyatlarini bajarishi ustidan jamoatchilik nazoratini tashkil etishga;
mahallada sog‘lom turmush tarzi va sog‘lom ijtimoiy-ma’naviy muhitni shakllantirishga ko‘maklashadi.

2026-yildan ushbu mexanizmda «kambag‘al oilalar» o‘rniga Ijtimoiy reestrga kiritilgan oilalar tushunchasi qo‘llaniladi.

Qaysi tashkilotlar ishtirok etadi?

Faol nuroniylarni tanlash va ularni oilalarga biriktirishda «Nuroniy» jamg‘armasi, O‘zbekiston mahallalari uyushmasi va tegishli davlat organlari hamkorlik qiladi.

Keksa fuqaro qo‘llab-quvvatlash choralariga ehtiyoj sezsa, mahalladagi mas’ullar yoki «Nuroniy» jamg‘armasining tegishli hududiy tuzilmasi orqali o‘z masalasini ko‘tarishi mumkin.

Normativ hujjatlar

Maqola foydali bo‘ldimi?

Bo‘limlar