Magistraturaga hujjat topshirish va qabul tartibi

Magistraturaga qabul bo‘yicha turdosh oliy ta’lim yo‘nalishlarining ro‘yxati tasdiqlandi

Ariza berish muddati

Magistraturaga hujjatlar har yili 1-iyuldan 30 iyulgacha, shu jumladan 30-iyul kuni ham, elektron shaklda qabul qilinadi.

Ariza:

Oliy ta’lim, fan va innovatsiyalar vazirligining maxsus elektron platformasi;
Yagona interaktiv davlat xizmatlari portali orqali beriladi.

Abiturient faqat tamomlagan bakalavriat yo‘nalishiga mos yoki turdosh magistratura mutaxassisligiga hujjat topshirishi mumkin. Turdosh yo‘nalishlar ro‘yxati har yili vazirlik tomonidan tasdiqlanadi.

Elektron hujjatlar

Ro‘yxatdan o‘tishda:

bakalavr diplomi va uning ilovasi;
belgilangan darajadagi milliy yoki xalqaro til sertifikati;
mavjud bo‘lsa, imtiyozni tasdiqlovchi hujjat yuklanadi.

2020/2021 o‘quv yilidan boshlab O‘zbekiston oliy ta’lim tashkilotlari tomonidan berilgan diplom ma’lumotlari o‘rtacha bali bilan HEMIS tizimida mavjud bo‘lsa, diplom va uning ilovasini qayta yuklash talab etilmaydi.

Xorijiy til sertifikati

Magistraturaga qabulda quyidagi darajadagi sertifikat talab qilinadi:

xorijiy tillar yo‘nalishlari uchun — kamida C1;
gumanitar, biologik va turdosh fanlar, matematika va statistika, biznes va boshqaruv, huquq, xizmat ko‘rsatish, ijtimoiy va xulq-atvor fanlari, jurnalistika va axborot hamda axborot-kommunikatsiya texnologiyalari uchun — kamida B2;
boshqa ta’lim sohalari, madaniyat va sport mutaxassisliklari uchun — kamida B1.

Ko‘rish, eshitish va nutqidagi nuqsoni bo‘yicha I yoki II guruh nogironligi bo‘lgan shaxslardan til sertifikati talab etilmaydi.

Muhim: talab qilinadigan sertifikat darajasi tanlangan magistratura mutaxassisligining ta’lim sohasiga bog‘liq. Sertifikat darajasi etarli bo‘lmasa, ariza qabul qilinmaydi.

Hujjatlarni ko‘rib chiqish

Qabul komissiyasi arizalarni har yili 10-avgustgacha ko‘rib chiqadi.

Arizaning qabul qilingani yoki rad etilgani, rad etilganda esa uning sababi shaxsiy kabinetda ko‘rsatiladi. Abiturient ariza holatini elektron platforma orqali kuzatib boradi.

Tanlov tartibi

Magistraturaga qabul alohida kirish imtihonisiz, abiturientlarning bakalavriat diplomidagi o‘rtacha ballari ketma-ketligi asosida amalga oshiriladi.

Tanlov:

har bir oliy ta’lim tashkiloti;
magistratura mutaxassisligi;
o‘qitish tili;
ta’lim shakli bo‘yicha alohida o‘tkaziladi.

Diplom bo‘yicha eng yuqori o‘rtacha ballga ega abiturientlar birinchi navbatda davlat grantiga, keyingi abiturientlar esa reyting asosida to‘lov-kontraktga tavsiya etiladi.

Qabul to‘g‘risidagi Davlat komissiyasi qarori har yili 25-avgustgacha qabul qilinadi.

Normativ hujjatlar

Maqola foydali bo‘ldimi?

Bo‘limlar