Nikoh shartnomasini tuzish

Nikoh shartnomasining mazmuni

Nikoh shartnomasi — nikohlanuvchi shaxslar yoki er-xotinning nikoh davridagi va nikoh bekor qilinganidan keyingi mulkiy huquq va majburiyatlarini belgilaydigan kelishuv.

Nikoh shartnomasi:

nikoh davlat ro‘yxatiga olinguniga qadar;
nikoh davrida tuzilishi mumkin.

Nikohdan oldin tuzilgan shartnoma nikoh davlat ro‘yxatiga olingan kundan kuchga kiradi.

Muhim: nikoh shartnomasi yozma shaklda tuzilishi va notarial tasdiqlanishi shart. Uni notarial tasdiqlash, o‘zgartirish yoki bekor qilish uchun davlat boji undirilmaydi.

Shartnomada nimalarni belgilash mumkin?

Er-xotin:

umumiy, ulushli yoki alohida mulk tartibini;
mavjud va kelajakda orttiriladigan mol-mulkning kimga tegishli bo‘lishini;
oila xarajatlarini to‘lash tartibini;
bir-biriga moddiy ta’minot berish shartlarini;
daromadlarda ishtirok etishni;
birgalikdagi tadbirkorlik faoliyatini;
nikoh bekor qilinganda har bir tarafga beriladigan mol-mulkni belgilashi mumkin.

Qanday shartlarni kiritish mumkin emas?

Nikoh shartnomasi:

er-xotinning huquq yoki muomala layoqatini cheklay olmaydi;
sudga murojaat qilish huquqini cheklay olmaydi;
shaxsiy nomulkiy munosabatlarni tartibga solmaydi;
bolalarga nisbatan huquq va majburiyatlarni belgilamaydi;
mehnatga layoqatsiz va ta’minotga muhtoj er yoki xotinning huquqini cheklamaydi;
taraflardan birini o‘ta noqulay holatga soluvchi shartlarni o‘z ichiga olmaydi.

O‘zgartirish va bekor qilish

Shartnoma er-xotinning kelishuvi bilan istalgan vaqtda o‘zgartirilishi yoki bekor qilinishi mumkin. Bunday kelishuv ham yozma va notarial shaklda rasmiylashtiriladi.

Shartnomani bajarishdan bir tomonlama bosh tortish mumkin emas. Nizo mavjud bo‘lsa, shartnoma sud tartibida o‘zgartirilishi, bekor qilinishi yoki to‘liq yoxud qisman haqiqiy emas deb topilishi mumkin.

Er yoki xotin nikoh shartnomasini tuzgani, o‘zgartirgani yoki bekor qilgani haqida o‘z kreditorlarini xabardor qilishi shart.

Normativ hujjatlar

Maqola foydali bo‘ldimi?

Bo‘limlar