Davlat bog‘chasi uchun ota-onalar to‘lovi

To‘lov miqdori nimaga bog‘liq?

Ota-onalar to‘lovi:

bog‘cha joylashgan hududga;
bolaning guruhda necha soat bo‘lishiga;
bir oiladan nechta bola davlat bog‘chasiga qatnashiga qarab belgilanadi.

Jadvalda birinchi summa — oiladan bitta bola qatnaganda, ikkinchi summa — bir oiladan ikki yoki undan ortiq bola qatnaganda har bir bola uchun to‘lov miqdori.

Hudud	4–5 soat	9 soat	10,5 soat	12 soat	24 soat
Toshkent shahri	51 000 / 34 000	272 000 / 194 000	324 000 / 231 000	367 000 / 260 000	387 000 / 276 000
Viloyat markazlari	47 100 / 33 000	263 000 / 186 000	315 000 / 223 000	348 000 / 245 000	368 000 / 263 000
Viloyat bo‘ysunuvidagi shaharlar	42 000 / 31 000	242 000 / 172 000	272 000 / 194 000	312 000 / 222 000	328 000 / 232 000
Tuman markazlari	38 000 / 26 000	178 000 / 134 000	242 000 / 183 000	275 000 / 206 000	292 000 / 219 000
Boshqa joylar	34 000 / 24 000	125 000 / 101 000	220 000 / 176 000	259 000 / 194 000	272 000 / 205 000

Ushbu miqdorlar 2025-yil 1 yanvardan amal qiladi.

To‘lov qachon amalga oshiriladi?

To‘lov har oyning 15-sanasidan kechiktirmay amalga oshiriladi.

Bola oyning 15-sanasidan keyin bog‘chaga qabul qilinsa, to‘lov bola kelgan kundan boshlab 3 kun ichida va shu oyda qatnashadigan kunlarga mutanosib ravishda to‘lanadi.

To‘lov naqd, bank kartasi, pul o‘tkazmasi yoki elektron to‘lov orqali amalga oshirilishi mumkin.

Bola bog‘chaga kelmasa to‘lov qayta hisoblanadimi?

Bola ketma-ket uch kundan ortiq:

o‘zi yoki oila a’zosi kasal bo‘lgani;
karantin;
ota-onasining mehnat yoki o‘qish ta’tili;
oldindan yozma xabar berilgan boshqa sabab bilan bog‘chaga kelmasa, to‘langan summa keyingi to‘lovda qayta hisoblanadi.

Kasallik yoki karantin tibbiy ma’lumotnoma bilan tasdiqlanadi. Boshqa sabablar bo‘yicha oldindan yozma ariza berish kerak va bunday qatnashmaslik bir yilda 60 kundan oshmasligi lozim.

Qayta hisoblash — bola uzrli sabab bilan qatnashmagan kunlar uchun to‘langan summani keyingi oy to‘lovidan chegirish.

To‘lov o‘z vaqtida to‘lanmasa nima bo‘ladi?

Belgilangan muddat o‘tganidan keyin to‘lov yana ikki hafta uzrli sababsiz to‘lanmasa, ota-ona bilan tuzilgan shartnoma to‘xtatilishi va bolaning bog‘chaga qatnashi bekor qilinishi mumkin.

Qarz 60 kun ichida to‘lansa, bolani bog‘chaga tiklash majburiy. 60 kundan keyin tiklash yangi qabul uchun belgilangan umumiy tartibda amalga oshiriladi.

Kimlar to‘lovdan ozod etiladi?

Bog‘chadagi bolalar umumiy sonining 15 foizi doirasida Ijtimoiy reestrga kiritilgan ehtiyojmand oilalar farzandlari ota-onalar to‘lovidan ozod etiladi.

Kvotadan qat’i nazar quyidagilarning farzandlari ham to‘lovdan ozod qilinadi:

boquvchisini yo‘qotgan ayollar;
Ayollarni reabilitatsiya qilish va moslashtirish markazlariga joylashtirilgan xotin-qizlar;
Vatan himoyasi yo‘lida olgan jarohati, kontuziyasi yoki mayibligi oqibatida halok bo‘lgan harbiy xizmatchilar va xodimlar.

Qonunchilikda belgilangan ayrim alohida ta’lim ehtiyojlari va tibbiy holatlarga ega bolalar uchun ham to‘lov imtiyozlari mavjud.