Uy-joy yoki kvartirani boshqa shaxsga o‘tkazish shartnomasi

O‘zbekiston Milliy axborot agentligi - rasmiy xabarlar, tezkor yangiliklar, tahliliy-tanqidiy materiallar, qonun hujjatlari, foto va videoreportajlar

Qanday bitimlar notarial tasdiqlanadi

Uy-joy, kvartira yoki boshqa ko‘chmas mulkni boshqa shaxsga o‘tkazish:

oldi-sotdi;
hadya;
ayirboshlash;
umrbod ta’minlash sharti bilan boshqa shaxsga berish;
qonunchilikda nazarda tutilgan boshqa bitimlar asosida amalga oshirilishi mumkin.

Bunday bitimlar notarial tasdiqlanishi kerak. Tasdiqlangan bitim to‘g‘risidagi ma’lumotlar ko‘chmas mulkka bo‘lgan huquqni davlat ro‘yxatidan o‘tkazish uchun belgilangan tartibda elektron tizim orqali yuboriladi.

Taqdim etiladigan asosiy hujjatlar

Taraflar, odatda:

pasport, ID-karta yoki boshqa amal qiluvchi shaxsni tasdiqlovchi hujjatni;
mulk huquqini tasdiqlovchi hujjatni — ma’lumot elektron tizimda mavjud bo‘lmasa;
vakil ishtirok etsa, uning vakolatini tasdiqlovchi hujjatni;
ko‘chmas mulk garovda bo‘lsa, garovga oluvchining roziligini;
voyaga etmagan yoki vasiylikdagi shaxs manfaatiga daxl qilinsa, vasiylik va homiylik organining ruxsatini;
yuridik shaxs ishtirok etsa, vakolatli organning tegishli qarorini taqdim etadi.

Er yoki xotinning roziligi

Nikoh davomida umumiy mablag‘lar hisobidan orttirilgan ko‘chmas mulk, kimning nomiga rasmiylashtirilganidan qat’i nazar, er-xotinning umumiy mol-mulki hisoblanishi mumkin. Uni boshqa shaxsga o‘tkazish uchun ikkinchi tomonning notarial tasdiqlangan yozma roziligi talab etiladi.

Rozilik, odatda, mulk:

nikohdan oldin orttirilgan;
meros tariqasida olingan;
hadya qilingan;
nikoh shartnomasi, notarial kelishuv yoki sud qarori asosida alohida mulk deb belgilangan bo‘lsa talab etilmaydi.

Notarius ma’lumotlarni qanday tekshiradi

Notarius elektron tizimlar orqali:

mulk huquqi va kadastr ma’lumotlarini;
ko‘chmas mulkka qo‘yilgan taqiq, xatlov va garovlarni;
kommunal xizmatlar bo‘yicha qarzdorlikni;
Majburiy ijro byurosi tizimidagi ijro qarzdorligini;
nikoh va oilaviy holat haqidagi ma’lumotlarni;
uy-joydan foydalanish huquqiga ega shaxslar haqidagi ma’lumotlarni tekshiradi.

Muhim: pulni to‘lashdan oldin ko‘chmas mulkning kadastr ma’lumotlari, mulkdorlari, garov va taqiqlar, qarzdorlik hamda uy-joydan foydalanish huquqini saqlab qolayotgan shaxslar haqidagi ma’lumotlarni tekshirish lozim.

To‘lov kechiktirib yoki bo‘lib-bo‘lib amalga oshiriladigan bitimda majburiyatlar to‘liq bajarilguniga qadar mulkni yana boshqa shaxsga o‘tkazishga taqiq qo‘yilishi mumkin.

To‘lovlar

«Davlat boji to‘g‘risida»gi Qonunga ko‘ra, ko‘chmas mulkni boshqa shaxsga o‘tkazish shartnomasini tasdiqlash uchun davlat boji:

Toshkent, Nukus shaharlari va viloyat markazlarida — 1 BHM;
boshqa aholi punktlarida — BHMning 50 foizi miqdorida undiriladi.

Yaqin qarindoshlar o‘rtasida bitim rasmiylashtirilganda belgilangan stavkaning 50 foizi undiriladi. Notariusning huquqiy va texnik xizmatlari uchun alohida to‘lovlar ham bo‘lishi mumkin.

Bitimlarni tasdiqlash tartibi Vazirlar Mahkamasining 726-son qarori bilan belgilangan.