Innovatsion faoliyat to‘g‘risida

Innovatsiya — amaliyotda katta ijtimoiy-iqtisodiy samara beradigan va fuqarolik muomalasiga kiritilgan yoki shaxsiy ehtiyojlar uchun foydalaniladigan yangi ishlanma.

Innovatsion faoliyatning printsiplari

«Innovatsion faoliyat to‘g‘risida»gi Qonunga muvofiq, innovatsion faoliyat:

faoliyat erkinligi;
davlat ko‘magidan teng foydalanish;
davlat ko‘magining oshkoraligi va aniq yo‘naltirilganligi;
raqobatni rivojlantirish;
axborotni erkin almashish;
intellektual mulkni huquqiy muhofaza qilish;
inson hayoti, sog‘lig‘i va atrof-muhitga zarar etkazmaslik printsiplariga asoslanadi.

Innovatsiyalarning turlari

Innovatsiyalar mahsulotga, jarayonga, marketingga va tashkiliy faoliyatga oid bo‘lishi mumkin.

Innovatsion faoliyat yangi g‘oyani yaratish, ilmiy-tadqiqot va tajriba-konstruktorlik ishlarini bajarish, texnologiyalar transferi, yangi ishlanmani sinovdan o‘tkazish, joriy etish va tijoratlashtirishni qamrab oladi.

Innovatsion faoliyat sub’ektlari

Innovatsion faoliyat sub’ektlari:

innovatsion faoliyatni amalga oshiruvchi jismoniy shaxslar;
davlat va xo‘jalik boshqaruvi organlari;
ilmiy, ilmiy-tadqiqot, oliy ta’lim va ishlab chiqarish tashkilotlari;
innovatsiya sohasidagi nodavlat notijorat tashkilotlari;
intellektual mulk ob’ektlariga bo‘lgan huquq egalari;
investorlar va tadbirkorlik sub’ektlaridir.

Ular innovatsion loyihalarda ishtirok etish, moliyalashtirish manbalarini mustaqil tanlash, intellektual mulk huquqlarini himoya qilish va qonunchilikda nazarda tutilgan imtiyozlardan foydalanish huquqiga ega.

Shu bilan birga, sub’ektlar qonunchilik talablariga rioya qilishi, byudjet mablag‘lari hisobidan yaratilgan ishlanmalarning tijoratlashtirilishini ta’minlashi va intellektual mulk huquqlarini himoya qilishi shart.

Davlat tomonidan qo‘llab-quvvatlash

Innovatsion faoliyat sohasidagi vakolatli davlat organi — O‘zbekiston Respublikasi Oliy ta’lim, fan va innovatsiyalar vazirligi.

Davlat tomonidan qo‘llab-quvvatlash:

innovatsion loyihalarni moliyalashtirish;
davlat buyurtmalarini shakllantirish;
soliq va bojxona imtiyozlarini berish;
texnologiyalar transferiga ko‘maklashish;
innovatsion infratuzilma va qo‘llab-quvvatlash jamg‘armalarini rivojlantirish orqali amalga oshirilishi mumkin.

Mahalliy davlat hokimiyatining vakillik organlari hududiy innovatsion dasturlarni tasdiqlaydi va ularning bajarilishini nazorat qiladi. Mahalliy ijro etuvchi hokimiyat organlari esa ushbu dasturlarni ishlab chiqadi va amalga oshiradi.

Innovatsiyalar yaratishga doir davlat buyurtmasi

Davlat buyurtmasi vakolatli organ tomonidan manfaatdor vazirliklar, idoralar va tashkilotlarning takliflari asosida shakllantiriladi.

Davlat buyurtmasi doirasidagi innovatsion loyihani amalga oshirishning eng ko‘p muddati ikki yildan oshmasligi kerak.

Loyihalarning texnik va ilmiy ekspertizasi ularning amaliy ahamiyati, ilmiy-texnologik darajasi, iqtisodiy samaradorligi va moliyalashtirish maqsadga muvofiqligini baholash uchun o‘tkaziladi.

Maqola foydali bo‘ldimi?

Bo‘limlar