Xizmat uylari va maxsus turar joylar

Maxsus turar joylar

Maxsus turar joylarga quyidagilar kiradi:

yotoqxonalar;
vaqtinchalik uy-joy fondi uylari;
nogironligi bo‘lgan shaxslar, faxriylar va yolg‘iz keksalar uchun internat-uylar;
bolalar uylari;
boshqa maxsus maqsadli uylar.

Internat-uylar, bolalar uylari va boshqa maxsus maqsadli uylardan turar joylar ularni tashkil etgan organning qarori asosida beriladi.

Yotoqxonalar xodimlar, davlat xizmatchilari, talabalar, o‘quvchilar va boshqa fuqarolarga ishlash, xizmat yoki o‘qish davrida yashash uchun berilishi mumkin. Uy-joyni yotoqxonaga o‘tkazish yoki yotoqxonaga turar joy maqomini berish uy-joy fondi mulkdori tomonidan mahalliy ijro etuvchi hokimiyat organi bilan kelishilgan holda amalga oshiriladi.

Xizmat turar joylari

Xizmat turar joyi mehnat munosabatlarining xususiyatiga ko‘ra ish joyiga bevosita yaqin yashashi zarur bo‘lgan shaxslar uchun mo‘ljallanadi.

Xizmat turar joylari olish huquqiga ega bo‘lgan shaxslar toifalariga, jumladan:

nasos stantsiyalari, gidrouzellar, to‘g‘onlar va gidrotexnik inshootlarga xizmat ko‘rsatuvchi xodimlar;
kommunal avariya-dispetcherlik va gazdan muhofaza qilish xizmatlari xodimlari;
elektr, aloqa, radio va televidenie ob’ektlariga xizmat ko‘rsatuvchi navbatchi mutaxassislar;
qishloq joylardagi ayrim tibbiyot xodimlari;
o‘rmon, qo‘riqxona va ovchilik xo‘jaliklari xodimlari;
harbiy xizmatchilar, ichki ishlar va prokuratura organlari xodimlari;
sudьyalar hamda qonunchilikda ko‘rsatilgan boshqa shaxslar kiradi.

Xizmat turar joyi berilganda fuqaro bilan turar joy mulkdori yoki uning vakolatli organi o‘rtasida yozma ijara shartnomasi tuziladi. Uy-joy, odatda, mehnat shartnomasi, xizmat yoki saylab qo‘yiladigan lavozim muddati davomida beriladi.

Xizmat turar joyini bo‘shatish

Mehnat yoki xizmat munosabatlari bekor qilinganda xizmat turar joyidan foydalanish huquqi ham bekor bo‘ladi. Xodim uy-joyni 1 oy ichida bo‘shatishi kerak. Ixtiyoriy ravishda bo‘shatilmasa, ko‘chirish sud tartibida amalga oshiriladi.

Biroq qonunchilikda belgilangan ayrim shaxslar boshqa turar joy berilmasdan ko‘chirilishi mumkin emas. Ular qatoriga:

I va II guruh nogironligi bo‘lgan shaxslar;
halok bo‘lgan yoki bedarak yo‘qolgan harbiy xizmatchilar oilalari;
nogironligi bo‘lgan farzandi bor oilalar;
xizmat uyini bergan tashkilotda kamida 10 yil ishlagan shaxslar;
mazkur tashkilotdan pensiyaga chiqqan xodimlar;
xizmat uyi berilgan shaxs vafot etganda uning oila a’zolari;
voyaga etmagan farzandlari bilan yashayotgan yolg‘iz shaxslar kiradi.

Muhim: xizmat turar joyi xodimning shaxsiy mulkiga aylanmaydi. Undan foydalanish huquqi mehnat yoki xizmat munosabatlari va tuzilgan ijara shartnomasiga bog‘liq.

Normativ hujjatlar

Maqola foydali bo‘ldimi?

Bo‘limlar