«Ayollar daftari» nima?

«Ayollar daftari» — ijtimoiy, iqtisodiy, tibbiy, psixologik yoki huquqiy yordamga muhtoj xotin-qizlarni aniqlash, ularning muammolarini hal etish va ko‘rsatilayotgan yordamni nazorat qilishga mo‘ljallangan axborot tizimi.

«Ayollar daftari»ga 30 yoshdan oshgan xotin-qizlar yashab turgan joyi bo‘yicha kiritiladi. Doimiy yoki vaqtincha ro‘yxatdan o‘tmaganlik daftarga kiritishni rad etish uchun asos bo‘lmaydi.

Kimlar «Ayollar daftari»ga kiritiladi?

Xotin-qiz quyidagi toifalardan faqat biriga kiritilishi mumkin:

1. Ijtimoiy himoyaga muhtoj ishsiz xotin-qizlar — ishlash istagi bo‘lgan, bandligi ta’minlanmagan va daromad manbaiga ega bo‘lmagan ehtiyojmand xotin-qizlar.
2. Tadbirkorlikni boshlash yoki kengaytirish istagidagi xotin-qizlar — ishsiz yoki o‘zini o‘zi band qilgan, tadbirkorlik bilan shug‘ullanish istagidagi ehtiyojmand xotin-qizlar.
3. Uy-joy sharoitini yaxshilashga muhtoj xotin-qizlar — doimiy turar joyi bo‘lmagan, noturar joyda yoki ijarada yashayotgan, bir xonadonda bir nechta oila bilan istiqomat qilayotgan yoxud uy-joyi ta’mirga muhtoj bo‘lgan xotin-qizlar.
4. Tibbiy va psixologik yordamga muhtoj xotin-qizlar — ruhiy holatini yaxshilash, jarrohlik amaliyotisiz davolanish yoki jarrohlik amaliyotini o‘tkazishga muhtoj xotin-qizlar.
5. Huquqiy yordamga muhtoj xotin-qizlar — huquqlari buzilgan, ajrim, yarashtiruv, sud, aliment va boshqa huquqiy masalalarda maslahat yoki amaliy yordamga muhtoj xotin-qizlar.

Qanday murojaat qilinadi?

Xotin-qizlarning muammolari:

• har yili yanvarь oyida «mahalla ettiligi» tomonidan uyma-uy o‘rganish;
• «mahalla ettiligi»ga bevosita murojaat qilish;
• «Ayollar daftari» axborot tizimi orqali murojaat yuborish asosida aniqlanadi.

«Mahalla ettiligi» — mahalla raisi rahbarligidagi hokim yordamchisi, yoshlar etakchisi, xotin-qizlar faoli, profilaktika inspektori, ijtimoiy xodim va soliq inspektoridan iborat guruh.

Anketa to‘ldirilganidan keyin 3 kun ichida ehtiyojmandlik toifasi aniqlanadi. Shundan so‘ng 3 kundan oshmagan muddatda xotin-qizni daftarga kiritish yoki asoslantirilgan tarzda rad etish haqida qaror qabul qilinadi. Daftarga kiritilgan har bir xotin-qiz uchun individual dastur ishlab chiqiladi.

Qanday yordamlar ko‘rsatilishi mumkin?

Ehtiyoj toifasi va individual dasturga qarab:

• ishga joylashtirish, kasbga o‘qitish va bandlikni ta’minlash;
• tadbirkorlikni yo‘lga qo‘yish yoki kengaytirishga ko‘maklashish;
• turar joy ijarasi uchun kompensatsiya, ijtimoiy uyga joylashtirish yoki uy-joyni ta’mirlash;
• tibbiy ko‘rik, davolanish va psixologik yordam;
• huquqiy maslahat, hujjatlarni rasmiylashtirish va sudga murojaat qilishda ko‘maklashish;
• qonunchilikda nazarda tutilgan boshqa ijtimoiy xizmatlar ko‘rsatilishi mumkin.

Ijtimoiy reestrdagi xotin-qizlarga jarrohlik amaliyotisiz davolanish xarajatlari BHMning 50 baravarigacha, jarrohlik amaliyoti xarajatlari esa davlat tibbiy sug‘urtasi bo‘yicha belgilangan bazaviy narxlar doirasida qoplanishi mumkin. Daftarga kiritilish barcha yordamlarni avtomatik olish huquqini bermaydi — yordam turi individual dastur va belgilangan mezonlar asosida aniqlanadi.

Qachon daftardan chiqariladi?

Xotin-qiz:

• individual dasturdagi yordamlar to‘liq ko‘rsatilganda;
• to‘liq davlat ta’minotiga olinganda;
• o‘z arizasiga ko‘ra;
• daftarga noqonuniy kiritilgani aniqlanganda;
• boshqa davlatga doimiy yashash uchun ko‘chib ketganda;
• ozodlikdan mahrum qilish haqidagi sud hukmi kuchga kirganda;
• vafot etganda yoki sud tomonidan bedarak yo‘qolgan deb topilganda daftardan chiqariladi.

Individual dasturdagi masalalar to‘liq hal etilmasdan turib xotin-qizni daftardan chiqarish mumkin emas.

Rad etishdan norozi bo‘lsa nima qilish mumkin?

Daftarga kiritish rad etilganda uning asoslantirilgan sababi ko‘rsatilishi kerak. Xotin-qiz noto‘g‘ri ma’lumotlarni tuzatishni talab qilishi, yuqori turuvchi Oila va xotin-qizlar organiga yoki ma’muriy sudga shikoyat qilishi mumkin.