O‘simlik dunyosi ob’ektlaridan maxsus foydalanishga ruxsatnoma olish

Qachon ruxsatnoma talab etiladi?

Yovvoyi holda o‘suvchi o‘simliklar yoki ularning qismlarini tabiiy muhitdan belgilangan hajmda olish maxsus foydalanish hisoblanadi. Bunday foydalanish qonunchilikda belgilangan hollarda tasdiqlangan kvotalar doirasida ruxsatnoma asosida amalga oshiriladi.

Maxsus foydalanishga, jumladan, dorivor, oziq-ovqatbop va texnik xom ashyo bo‘lgan yovvoyi o‘simliklarni yig‘ish yoki tayyorlash kabi faoliyatlar kirishi mumkin.

Maxsus ekin maydonlari — plantatsiyalar va parvarishxonalarda etishtirilgan o‘simliklarni yig‘ish uchun ruxsatnoma talab etilmaydi.

Kim murojaat qilishi mumkin?

Ruxsatnoma olish uchun jismoniy va yuridik shaxslar murojaat qilishi mumkin.

Ariza «Litsenziya» axborot tizimi yoki Yagona interaktiv davlat xizmatlari portali orqali elektron tarzda beriladi. Arizada foydalanish rejalashtirilayotgan o‘simlik turi, miqdori, joyi va maqsadiga doir zarur ma’lumotlar ko‘rsatiladi.

Arizani ko‘rib chiqish qancha turadi?

Arizani ko‘rib chiqish uchun BHMning 30 foizi miqdorida yig‘im undiriladi.

Bundan tashqari, ruxsatnoma berilganda o‘simlik turi va olinadigan hajmga qarab o‘simlik dunyosi ob’ektlaridan maxsus foydalanganlik uchun qonunchilikda belgilangan alohida to‘lov hisoblanadi.

Ariza qancha vaqtda ko‘rib chiqiladi?

Arizani ko‘rib chiqishning asosiy muddati — 5 ish kuni.

Agar qaror qabul qilish uchun qo‘shimcha tadqiqot, tekshirish yoki boshqa ilmiy-texnik baholash o‘tkazish zarur bo‘lsa, ko‘rib chiqish muddati 20 ish kunigacha uzaytirilishi mumkin.

Ruxsatnoma olgandan keyin qanday talablarga rioya qilish kerak?

Foydalanuvchi:

faqat ruxsatnomada ko‘rsatilgan tur, hajm, joy va muddat doirasida faoliyat yuritishi;
tabiiy o‘simlik qoplamini asrash va qayta tiklash choralarini ko‘rishi;
muhofaza etiladigan tabiiy hududlarda belgilangan maxsus rejimga rioya qilishi;
ruxsatnomaning amal qilish muddati tugaganidan keyin 10 ish kuni ichida yig‘ilgan o‘simlik hajmi, vaqti va joyi haqida qisqa hisobot taqdim etishi kerak.

Eslatma: ruxsatnoma uchun yig‘im to‘langani tabiiy muhitdan istalgan miqdorda o‘simlik yig‘ish huquqini bermaydi. Maxsus foydalanish ruxsatnoma va belgilangan kvota doirasida amalga oshiriladi.

Normativ hujjatlar

Maqola foydali bo‘ldimi?

Bo‘limlar