Ta’lim, ilm-fan, sport va sog‘liqni saqlashda xotin-qizlar hamda erkaklar uchun teng imkoniyatlar

Ta’lim olishda teng imkoniyatlar

«Ta’lim to‘g‘risida»gi Qonun har kimga ta’lim olish uchun teng huquqlarni kafolatlaydi. Ta’lim muassasasiga qabul qilish, o‘qitish, baholash yoki ta’lim xizmatlaridan foydalanishda shaxsni jinsi sababli asossiz cheklashga yo‘l qo‘yilmaydi.

Gender strategiyasi quyidagilarni nazarda tutadi:

xotin-qizlar va erkaklarni butun umr davomida o‘qishga rag‘batlantirish;
ijtimoiy himoyaga muhtoj xotin-qizlarni ta’lim bilan qamrab olish;
xotin-qizlarni ilm-fan, axborot texnologiyalari va innovatsiyalarga keng jalb qilish;
darsliklar va o‘quv materiallarini gender ekspertizasidan o‘tkazish;
kasb tanlashda gender stereotiplarini kamaytirish.

Qizlar faqat muayyan kasblarga, o‘g‘il bolalar esa boshqa kasblarga mos degan qarash ta’lim va kasb tanlash imkoniyatlarini cheklamasligi kerak.

Ilm-fan va sport

Xotin-qizlarning ilmiy loyihalar, innovatsion ishlanmalar, ixtirochilik va raqamli texnologiyalardagi ishtiroki qo‘llab-quvvatlanadi.

Sport sohasida xotin-qizlar va erkaklar uchun sport ob’ektlari, mashg‘ulotlar, musobaqalar va professional tayyorgarlikdan teng foydalanish imkoniyatlari yaratilishi lozim.

Sog‘liqni saqlash va reproduktiv salomatlik

Xotin-qizlar va erkaklar tibbiy axborot, profilaktika, diagnostika va davolash xizmatlaridan teng foydalanish huquqiga ega.

Strategiya oilani rejalashtirish bo‘yicha tibbiy madaniyatni oshirish, reproduktiv salomatlikni mustahkamlash, yaqin qarindoshlar o‘rtasidagi nikohlarning salbiy oqibatlari haqida xabardorlikni oshirish va qishloq joylarida tibbiy-ijtimoiy xizmatlar sifatini yaxshilashni nazarda tutadi.

Tibbiy xizmat ko‘rsatishda insonning qadr-qimmati, shaxsiy hayoti va tibbiy sirining daxlsizligi ta’minlanishi kerak.

Amaliy natijalar

2026-yilgi kompleks chora-tadbirlar dasturida qayd etilishicha, 2025-yilda oliy ta’limda tahsil olayotgan xotin-qizlar ulushi bakalavriatda 53,9 foizni, magistraturada 66,1 foizni, oliy ta’limdan keyingi ta’limda esa 52 foizni tashkil etgan.

Maqola foydali bo‘ldimi?

Bo‘limlar