Transport vositalarini majburiy texnik ko‘rikdan o‘tkazish

Texnik ko‘rik davriyligi

Quyidagi transportlar yiliga 2-marta texnik ko‘rikdan o‘tkaziladi:

tijorat asosida yo‘lovchi tashuvchi engil avtomobillar;
avtobuslar, trolleybuslar va tramvaylar;
haydovchi o‘rnidan tashqari kamida 8 ta o‘rindiqqa ega, odam tashishga mo‘ljallangan yuk avtomobillari;
yirik gabaritli, og‘ir vaznli va xavfli yuk tashuvchi maxsus transportlar.

Quyidagi transportlar 2 yilda bir marta ko‘rikdan o‘tkaziladi:

yuridik shaxslarga tegishli, ishlab chiqarilganiga 6 yildan oshmagan barcha toifadagi transportlar;
jismoniy shaxslarga tegishli M2, M3, N va O toifadagi, ishlab chiqarilganiga 6 yildan oshmagan transportlar;
jismoniy shaxslarga tegishli M1 va L toifadagi, ishlab chiqarilganiga 11–14 yil bo‘lgan transportlar.

Quyidagi transportlar har yili ko‘rikdan o‘tkaziladi:

yuridik shaxslarga tegishli, ishlab chiqarilganiga 6 yildan oshgan transportlar;
jismoniy shaxslarga tegishli M2, M3, N va O toifadagi, ishlab chiqarilganiga 6 yildan oshgan transportlar;
ishlab chiqarilgan vaqti aniq bo‘lmagan transportlar;
jismoniy shaxslarga tegishli M1 va L toifadagi, ishlab chiqarilganiga 15 yil va undan ortiq bo‘lgan transportlar.

Boshqa davriylikka kirmaydigan, STG-3 turdagi gaz balloni o‘rnatilgan transport vositalari 3 yilda bir marta texnik ko‘rikdan o‘tkaziladi.

Muhim: jismoniy shaxslarga tegishli, ishlab chiqarilganiga 10 yilgacha bo‘lgan M1 va L toifadagi transport vositalari texnik ko‘rikdan ixtiyoriy ravishda o‘tkaziladi. Tijorat asosida yo‘lovchi tashish hollari bundan mustasno.

Texnik ko‘rik o‘tkaziladigan muddatlar

Yiliga ikki marta ko‘rikdan o‘tadigan transportlar:

birinchi marta — 1-martdan 30 iyungacha;
ikkinchi marta — 1 sentyabrdan 31 oktyabrgacha ko‘rikdan o‘tkaziladi.

Boshqa transport vositalari 1 yanvardan 31 dekabrgacha ko‘rikdan o‘tkaziladi.

Murojaat qilish va ko‘rik joyi

Transport vositasi:

YHXXning diagnostika stantsiyasida;
shartnoma asosida texnik xizmat ko‘rsatish stantsiyasida;
talablarga javob beradigan tadbirkorlik sub’ektining texnik bazasida ko‘rikdan o‘tkazilishi mumkin.

Ko‘rik transport ro‘yxatdan o‘tgan hududda yoki mulkdorning xohishiga ko‘ra eksterritorial tartibda boshqa hududda ham o‘tkaziladi.

Texnik ko‘rikdan o‘tish uchun YaIDXPdagi «Engil avtotransport vositalarini texnik ko‘rikdan o‘tkazish laboratoriyalari» xizmati orqali elektron so‘rov yuborish mumkin. Xizmat bepul, natija avtomatik shakllantiriladi. Transport vositasining texnik holati esa tanlangan laboratoriya yoki diagnostika stantsiyasida bevosita tekshiriladi.

Texnik ko‘rik uchun to‘lov

YHXX organi o‘tkazadigan texnik ko‘rik uchun belgilangan yig‘im undiriladi. Tadbirkorlik sub’ekti tomonidan o‘tkaziladigan ko‘rik narxini ushbu sub’ekt mustaqil belgilaydi.

Birinchi ko‘rikda transport nosoz deb topilsa, takroriy ko‘rik uchun ham to‘lov undirilishi mumkin.

Amaldagi tartib Vazirlar Mahkamasining 2021-yil 9-martdagi 125-son qarori, to‘lovlar esa 2303-son hujjat bilan belgilangan.