Daraxt va butalarni kesish yoki ko‘chirib o‘tkazishga ruxsatnoma olish tartibi

Kim ruxsatnoma olishi mumkin?

Davlat o‘rmon fondiga kirmaydigan daraxt va butalarni kesish yoki qonunchilikda belgilangan hollarda ko‘chirib o‘tkazish uchun jismoniy va yuridik shaxslar ruxsatnoma olishga murojaat qilishi mumkin.

Ruxsat berish vakolati Ekologiya va iqlim o‘zgarishi milliy qo‘mitasining tegishli hududiy bo‘linmalariga tegishli.

Arizada qanday ma’lumotlar bo‘lishi kerak?

Arizada:

ariza beruvchi haqidagi ma’lumotlar;
daraxt va butalarning turi;
ularning soni;
aniq joylashgan manzili;
kesish yoki ko‘chirib o‘tkazishdan maqsad ko‘rsatiladi.

Murojaat maxsus elektron tizim orqali amalga oshiriladi.

Arizani ko‘rib chiqish qancha turadi?

Arizani ko‘rib chiqish uchun BHMning 30 foizi miqdorida yig‘im to‘lanadi.

Agar daraxtni kesishga ruxsat berilsa, daraxtning turi va tanasi diametriga qarab BHMga nisbatan belgilangan koeffitsientlarda kesish uchun alohida to‘lov hisoblanadi. Shu sababli barcha daraxtlar uchun yagona ruxsatnoma qiymati mavjud emas.

Ariza qancha vaqtda ko‘rib chiqiladi?

Amaldagi tartib bo‘yicha ariza 10 ish kuni ichida ko‘rib chiqiladi.

Ruxsat berish jarayonida vakolatli organ daraxt va butalarni joyiga chiqqan holda o‘rganadi, ularni saqlab qolish yoki ko‘chirib o‘tkazish imkoniyatini baholaydi. Qonunchilikda nazarda tutilgan hollarda kesish yoki ko‘chirish masalasi yuzasidan jamoatchilik eshituvi ham o‘tkaziladi.

Daraxtni ko‘chirish imkoni bo‘lsa nima bo‘ladi?

Daraxtni qurilish yoki boshqa qonuniy sabab tufayli joyidan olib tashlash zarur bo‘lsa, avvalo uni boshqa joyga ko‘chirib o‘tkazish imkoniyati ko‘rib chiqiladi.

Ko‘chirish mumkin bo‘lgan daraxt ruxsatnoma asosida boshqa joyga o‘tkaziladi va u 3 yil davomida parvarish qilinishi kerak.

Kesilgan daraxt o‘rniga ko‘chat ekish shartmi?

Ruxsatnoma asosida kesilgan har bir daraxt yoki buta uchun kompensatsiya tarzida 10 tup yirik o‘lchamli ko‘chat ekish talab etiladi.

Daraxt ko‘chati 5 yillik, buta ko‘chati 3 yillik bo‘lishi va ular kamida 2 yil parvarish qilinishi kerak.

Qachon to‘lov yoki ruxsatnoma talab etilmaydi?

Qurigan yoki kasallangan daraxtni tanasi yoki tag qismidan sanitariya maqsadida kesish tegishli komissiya qaroridan keyin to‘lovsiz ruxsatnoma asosida amalga oshiriladi.

Daraxt va butalarning shoxlarini sanitariya maqsadida kesish yoki butash uchun ruxsatnoma talab etilmaydi.

Eslatma: arizani ko‘rib chiqish uchun to‘lanadigan 30 foiz BHM yig‘imi bilan daraxtni kesish uchun hisoblanadigan to‘lov bir xil emas. Kesishga ruxsat berilganda daraxt turi va diametriga qarab alohida to‘lov hisoblanishi mumkin.

Normativ hujjatlar

Maqola foydali bo‘ldimi?

Bo‘limlar