Intellektual mulk ob’ektlariga nisbatan mutlaq huquqlar

Mutlaq huquq nima?

Intellektual mulk ob’ektiga nisbatan mulkiy huquq egasi undan o‘z xohishiga ko‘ra, qonun doirasida har qanday shakl va usulda foydalanish huquqiga ega.

Boshqa shaxslar huquq egasiga mutlaq huquq asosida tegishli bo‘lgan ob’ektdan, qonunda belgilangan istisnolardan tashqari, uning ruxsatisiz foydalana olmaydi.

Huquq egasi o‘z huquqini boshqa shaxsga berishi mumkinmi?

Ha. Agar maxsus qonunda boshqacha tartib belgilanmagan bo‘lsa, huquq egasi mulkiy huquqlarni:

shartnoma asosida boshqa shaxsga to‘liq yoki qisman o‘tkazishi;
boshqa shaxsga ob’ektdan foydalanishga ruxsat berishi;
qonunda nazarda tutilgan boshqa tarzda tasarruf etishi mumkin.

Mutlaq huquqlar meros tartibida, yuridik shaxs qayta tashkil etilganda esa huquqiy vorislik asosida ham o‘tishi mumkin.

Shartnomada qaysi huquqlar o‘tkazilayotgani yozilishi shartmi?

Ha. Boshqa shaxsga o‘tkazilayotgan mutlaq huquqlar shartnomada aniq belgilanishi kerak.

Shartnomada o‘tkazilayotgan huquq sifatida ko‘rsatilmagan huquq, qoida tariqasida, o‘tkazilmagan deb hisoblanadi.

Shuning uchun shartnomada ob’ekt, o‘tkazilayotgan huquqlar hajmi va boshqa muhim shartlarni aniq ifodalash zarur.

Mualliflik huquqini ham boshqa shaxsga o‘tkazish mumkinmi?

Mualliflik kabi shaxsiy nomulkiy va begonalashtirilmaydigan huquqlar mulkiy huquq bilan birga boshqa shaxsga o‘tmaydi.

Bunday shaxsiy huquqni o‘tkazish yoki cheklashni nazarda tutuvchi shartnoma sharti o‘z-o‘zidan haqiqiy emas.

Huquqni o‘tkazish shartnomasi davlat ro‘yxatidan o‘tkaziladimi?

Intellektual mulk ob’ektining turiga qarab, huquqlarni o‘tkazish yoki litsenziya shartnomasini davlat ro‘yxatidan o‘tkazish talab qilinishi mumkin.

Amaldagi ma’muriy reglament ixtiro, foydali modelь, sanoat namunasi, selektsiya yutug‘i, tovar belgisi va boshqa nazarda tutilgan ob’ektlarga oid shartnomalarni ro‘yxatdan o‘tkazish tartibini belgilaydi. EHM dasturi yoki ma’lumotlar bazasiga oid huquqlarni o‘tkazish va litsenziya shartnomasini ro‘yxatdan o‘tkazish taraflarning kelishuviga ko‘ra ixtiyoriy.

Ro‘yxatdan o‘tkazish uchun Davlat xizmatlari markazi, Adliya vazirligining maxsus axborot tizimi yoki YaIDXP orqali murojaat qilish mumkin.

Eslatma: intellektual mulk ob’ektining o‘zini sotish bilan unga bo‘lgan mutlaq huquqni o‘tkazish bir xil emas. Qaysi huquqlar boshqa shaxsga o‘tayotgani shartnomada aniq ko‘rsatilishi kerak.

Normativ hujjatlar

Maqola foydali bo‘ldimi?

Bo‘limlar