Ijtimoiy reestrdagi yoshlarga to‘lov-kontraktning bir qismini qoplash

Yoshlar daftariga kiritilgan talabalarning 16,5 mln so‘mgacha bo‘lgan to‘lov- kontrakt pullari to‘lab beriladi | UzReport.news

Kimlar yordam olishi mumkin?

To‘lov-kontraktning bir qismini qoplash uchun ariza beruvchi:

14 yoshga to‘lgan va 31 yoshga to‘lmagan bo‘lishi;
Ijtimoiy reestrga kiritilgan oilaning a’zosi bo‘lishi;
P-EMIS tizimidan foydalanadigan kasbiy ta’lim tashkilotida kunduzgi shaklda;
yoki HEMIS tizimidan foydalanadigan davlat, nodavlat, xorijiy oliy ta’lim tashkiloti yoxud uning O‘zbekistondagi filialida bakalavriat yoki magistraturaning kunduzgi shaklida to‘lov-kontrakt asosida o‘qiyotgan bo‘lishi kerak.

Kimlarga yordam berilmaydi?

Quyidagi ta’lim turlari va shakllariga yordam tatbiq etilmaydi:

ikkinchi va undan keyingi mutaxassislik;
masofaviy ta’lim;
sirtqi ta’lim;
kechki ta’lim;
qo‘shma ta’lim dasturi;
tabaqalashtirilgan to‘lov-kontrakt — super-kontrakt.

Shuningdek, Ijtimoiy reestrga kiritilmagan oila a’zosi mazkur yordamdan foydalana olmaydi.

Qancha miqdorda qoplanadi?

To‘lov-kontrakt summasining 50 foizigacha, biroq BHMning 50 baravaridan ko‘p bo‘lmagan miqdorda qoplanishi mumkin.

To‘lov-kontraktni qoplash — belgilangan yordam summasini talabaga naqd pulda berish emas, balki ta’lim tashkilotining bank hisobvarag‘iga o‘tkazish.

Aniq summa «mahalla ettiligi» qarori va ijtimoiy shartnoma shartlarining bajarilish darajasiga qarab belgilanadi.

Qanday va qachon murojaat qilinadi?

Ariza:

istalgan Davlat xizmatlari markaziga;
YaIDXP orqali;
Yoshlar yagona elektron platformasi orqali beriladi.

Ariza beruvchi bir vaqtning o‘zida «Yoshlar daftari»ga kiritish va to‘lov-kontrakt yordamini ajratishni so‘raydi. Murojaatlar yil davomida qabul qilinadi, iyulь, avgust va sentyabrь oylari bundan mustasno.

Ariza qanday ko‘rib chiqiladi?

To‘lov-kontrakt va qarzdorlikka oid ma’lumotlar tegishli axborot tizimlari orqali tekshiriladi. Murojaat mahalladagi yoshlar etakchisiga yuboriladi, zarur ijtimoiy shartnoma rasmiylashtiriladi va «mahalla ettiligi» tomonidan 5 ish kuni ichida ko‘rib chiqiladi.

Ijobiy qaror qabul qilinganda mablag‘ talabaga emas, ta’lim tashkilotining bank hisobvarag‘iga o‘tkaziladi. To‘lov miqdori ijtimoiy shartnoma shartlarining birinchi oyda bajarilishiga mutanosib ravishda aniqlanadi.

Ijtimoiy shartnomada qanday majburiyatlar bo‘ladi?

Ariza beruvchi:

yordam ajratilgan semestrda o‘rtacha o‘zlashtirish ko‘rsatkichini kamida 4 baho darajasida saqlashi;
volontyorlik loyihalarida ishtirok etishi;
6 oy davomida «Mutolaa» loyihasi doirasida har oy bitta kitob o‘qishi;
6 oy davomida «Ibrat farzandlari» loyihasida xorijiy til bo‘yicha kamida B1 darajaga erishishi kerak.

Rad etilsa nima qilish mumkin?

Rad etishga Ijtimoiy reestrda mavjud emaslik, ta’lim shaklining talabga mos kelmasligi, noto‘g‘ri ma’lumot yoki zarur hujjatlarni taqdim etmaslik sabab bo‘lishi mumkin.

Ariza beruvchi ma’lumotlardagi xatoni tuzatishi, etishmayotgan hujjatni taqdim etishi, qarordan yuqori turuvchi Yoshlar ishlari organiga yoki ma’muriy sudga shikoyat qilishi mumkin.

Normativ hujjatlar

Vazirlar Mahkamasining 2022-yil 7-iyundagi 312-son qarori