Advokatura faoliyatining printsiplari va tashkiliy shakllari

Advokat o‘z faoliyatini qanday shaklda amalga oshiradi?

Litsenziya olgan advokat:

o‘zining advokatlik byurosini tashkil etib yakka tartibda;
boshqa advokatlar bilan advokatlik firmasini tashkil etib;
a’zolikka asoslangan advokatlar hay’atida;
yuridik maslahatxonada faoliyat yuritishi mumkin.

Advokat bir vaqtning o‘zida faqat bitta advokatlik tuzilmasida faoliyat olib borishi mumkin.

Advokatlik byurosi nima?

Advokatlik byurosi advokatning yuridik yordamni yakka tartibda ko‘rsatishi uchun tashkil etiladigan advokatlik tuzilmasidir.

Byuro tashkil etgan advokat o‘zining mulk huquqi yoki boshqa qonuniy asosda foydalanayotgan turar joyida ham faoliyat olib borishi mumkin. Buning uchun bunday turar joyni albatta noturar joy toifasiga o‘tkazish talab qilinmaydi.

Advokatlik firmasi va advokatlar hay’ati o‘rtasida qanday farq bor?

Advokatlik firmasi sheriklikka asoslangan advokatlik tuzilmasidir. Uni tashkil etgan advokatlar yuridik yordam ko‘rsatish uchun o‘z faoliyatini birlashtiradi.

Advokatlar hay’ati esa a’zolikka asoslangan advokatlik tuzilmasidir.

Advokatlik byurosi, firmasi va hay’ati davlat ro‘yxatidan o‘tkazilgan kundan yuridik shaxs maqomini oladi.

Advokatlik firmasi va advokatlar hay’atining joylashgan joyi yashash uchun mo‘ljallanmagan binoda bo‘lishi kerak.

Yuridik maslahatxona qachon tashkil etiladi?

Yuridik maslahatxona tegishli hududda aholi va tashkilotlarning yuridik yordamga bo‘lgan ehtiyojini qondirish uchun advokatlik tuzilmalari etarli bo‘lmagan hollarda Advokatlar palatasining hududiy boshqarmasi tomonidan tashkil etiladi.

Yuridik maslahatxona yuridik shaxs hisoblanmaydi va hisobga qo‘yilgan kundan faoliyat boshlaydi.

Advokatlik tuzilmalari qanday ro‘yxatdan o‘tkaziladi?

Advokatlik byurosi, advokatlik firmasi va advokatlar hay’atini davlat ro‘yxatidan o‘tkazish, shuningdek yuridik maslahatxonani hisobga olish davlat xizmatlari markazlari orqali belgilangan tartibda amalga oshiriladi.

Ularning ichki tuzilmasi, boshqaruv organlari, mablag‘larni sarflash tartibi va boshqa tashkiliy masalalar tegishli ustav, nizom va ta’sis hujjatlari bilan tartibga solinadi.

Eslatma: advokatlik tuzilmasining shakli advokatning professional mustaqilligini bekor qilmaydi. Advokat yuridik yordam ko‘rsatishda qonunchilik va kasb etikasi talablariga mustaqil ravishda rioya qiladi.

Normativ hujjatlar

Maqola foydali bo‘ldimi?

Bo‘limlar