Chakana savdoda aktsiya va chegirmalar o‘tkazish qoidalari

do'kon” tegli maqolalar

Qachon narx «chegirma» hisoblanadi?

Sotuvchi iste’molchilar qiziqishini oshirish va sotuvni ko‘paytirish maqsadida tovarlarga aktsiya yoki chegirmalar qo‘llashi mumkin, qonunchilikda bunday choralar taqiqlangan tovarlar bundan mustasno.

Agar sotuvchi tovarning chegirmadan oldingi narxini ko‘rsatsa, bu chegirma hisoblanadi. Bunda ko‘rsatilgan oldingi narx chegirma e’lon qilinguniga qadar oxirgi 30 kunda amal qilgan eng past narx bo‘lishi shart. Qishloq xo‘jaligi mahsulotlari uchun ushbu 30 kunlik qoida istisno qilingan.

Soxta chegirma qilish mumkinmi?

Yo‘q. Sotuvchi avval tovar narxini sun’iy ravishda oshirib, keyin pasaytirilgan narxni chegirma sifatida ko‘rsatish orqali iste’molchini chalg‘itishi taqiqlangan.

Sotuvchi chegirma e’lon qilinganda tovarlar va narxlarning hisobini yuritishi, oxirgi 30 kundagi narxlarni qayd qilishi va iste’molchi talab qilsa ushbu ma’lumotni taqdim etishi shart.

Aktsiya e’lonida nimalar ko‘rsatilishi shart?

Rag‘batlantiruvchi aktsiya e’lon qilinganda sotuvchi iste’molchiga aniq va tushunarli shaklda:

aktsiyaning boshlanish va tugash muddatini;
tovarni sotib olish shartlarini;
aktsiyada qatnashadigan tovar nomi yoki toifasini;
tovarlar miqdorini;
boshqa muhim shartlarni oldindan ma’lum qilishi lozim.

Aktsiya e’lon qilingach, uning shartlarini o‘zgartirish mumkin emas. E’lon qilingan chegirma, bonus yoki boshqa imtiyozlar amalda ham haqiqatda berilishi shart.

Chegirma narxi qanday ko‘rsatiladi?

Chegirma:

aniq foiz yoki summa shaklida ko‘rsatilishi;
tovarning yakuniy narxini oson tushunish imkonini berishi;
iste’molchi talab qilsa, chegirmadan oldingi narx haqida aniq ma’lumot berilishi;
oldingi eng past narx hujjat yoki boshqa dalil bilan tasdiqlanishi kerak.

Agar tovarlar soni cheklangan bo‘lsa yoki chegirma yaroqlilik muddati yaqinlashgani, qadoq shikastlangani, mavsum tugayotgani yoki eski zaxiralar sotilayotgani sababli berilsa, bu holat iste’molchiga oldindan ma’lum qilinishi shart.

Shaxsiy ma’lumot talab qilinsa-chi?

Agar chegirma olish uchun iste’molchi ro‘yxatdan o‘tishi yoki shaxsga doir ma’lumotlarini taqdim etishi kerak bo‘lsa, sotuvchi shaxsga doir ma’lumotlar to‘g‘risidagi qonunchilikka rioya qilishi hamda ma’lumotlarni qayta ishlash maqsadi va shartlari haqida iste’molchini xabardor qilishi shart.

Eslatma: «avvalgi narx» deb istalgan yuqori narxni yozib qo‘yish mumkin emas. Qishloq xo‘jaligi mahsulotlaridan tashqari, sotuvchi u oxirgi 30 kun ichidagi eng past narx bo‘lganini asoslay olishi kerak.

Normativ hujjatlar

Maqola foydali bo‘ldimi?

Bo‘limlar