Kimlar talabalar turar joyiga ustuvor tartibda joylashtiriladi

Imtiyozli ro‘yxat nima

Davlat oliy ta’lim muassasasi talabalar turar joyiga joylashtirishda talabalar:

— imtiyozli ro‘yxat;

— umumiy ro‘yxat bo‘yicha ajratiladi.

Imtiyozli ro‘yxatga kiritilgan talabalar talabalar turar joyiga birinchi navbatda joylashish huquqiga ega.

Imtiyozli ro‘yxat — qonunchilikda belgilangan ijtimoiy yoki boshqa mezonlarga javob beradigan va talabalar turar joyiga birinchi navbatda joylashish huquqiga ega talabalar ro‘yxati.

Kimlar ustuvor tartibda joylashtiriladi

Tegishli ma’lumotlar asosida imtiyozli ro‘yxatga:

— «Mehribonlik uylari» tarbiyalanuvchilari, etim va ota-ona qaramog‘idan mahrum bo‘lgan talabalar;

— Ijtimoiy reestr, «Temir daftar», «Ayollar daftari» va «Yoshlar daftari»ga kiritilgan ijtimoiy himoyaga muhtoj oilalar farzandlari;

— I va II guruh nogironligi bo‘lgan talabalar;

— xorijiy davlat fuqarosi bo‘lgan talabalar;

— bir oiladan bakalavriatning kunduzgi shaklida ikki yoki undan ortiq farzandi to‘lov-kontrakt asosida o‘qiyotgan oilalar farzandlari;

— Ijtimoiy reestrga kiritilgan oilalar farzandlari kiritiladi.

Yutuq va faollik asosidagi imtiyozlar

OTM rektori yoki direktori buyrug‘i asosida quyidagi talabalar ham imtiyozli ro‘yxatga kiritiladi:

— xalqaro va Oliy ta’lim, fan va innovatsiyalar vazirligi o‘tkazadigan respublika fan olimpiadalari g‘oliblari;

— «Zakovat» intellektual o‘yini respublika bosqichi g‘oliblari;

— «Yil talabasi» respublika bosqichi g‘oliblari;

— «Talabalar teatr studiyalari» tanlovining respublika bosqichi g‘oliblari;

— talabalar turar joyida talabalar kengashi raisi yoki qavat sardori bo‘lgan talabalar.

Eslatma: imtiyozli toifaga kirish talabani avtomatik ravishda yotoqxonaga joylashtirildi degani emas. U birinchi navbatda joylashish huquqini beradi; amalda joylashtirish talabalar turar joyidagi mavjud o‘rinlar asosida amalga oshiriladi.

Imtiyozni tasdiqlash uchun hujjat kerakmi

Ko‘p holatlarda alohida ma’lumotnoma olib kelish talab etilmaydi.

Imtiyozli toifaga mansublik haqidagi ma’lumotlar tegishli davlat organlarining axborot tizimlaridan idoralararo elektron hamkorlik orqali avtomatik olinadi.

Jumladan:

— Ijtimoiy reestr ma’lumotlari — tegishli davlat axborot tizimidan;

— nogironlik haqidagi ma’lumotlar — Ijtimoiy himoya milliy agentligi tizimidan;

— «Yoshlar daftari» ma’lumotlari — Yoshlar ishlari agentligi tizimidan;

— talabalik haqidagi ma’lumotlar — tegishli ta’lim axborot tizimlaridan tekshiriladi.

Agar zarur ma’lumot elektron tizimdan topilmasa, talabadan imtiyozli mezonga muvofiqligini tasdiqlovchi hujjat nusxasi so‘ralishi mumkin.

Umumiy ro‘yxatda o‘rinlar qanday taqsimlanadi

Imtiyozli toifalar joylashtirilganidan keyin qolgan o‘rinlar umumiy ro‘yxatga kiritilgan talabalar o‘rtasida taqsimlanadi.

Qolgan o‘rinlarning:

— 55–65 foizi — 1-kurs talabalariga;

— 15–20 foizi — 2-kurs talabalariga;

— 20–25 foizgacha — 3-kurs va undan yuqori kurs talabalariga ajratiladi.

Ariza qanday beriladi

2024/2025 o‘quv yilidan boshlab davlat OTMlarining barcha kurs talabalari talabalar turar joyiga elektron tartibda murojaat qiladi.

Arizalar har yili 1-avgustdan o‘quv yili yakuniga qadar Davlat xizmatlari markazi yoki YaIDXP orqali beriladi. Davlat xizmatini ko‘rsatish uchun to‘lov undirilmaydi.

Mazkur Reglament xorijiy, nodavlat va harbiy OTMlar talabalar turar joylariga, shuningdek davlat-xususiy sheriklik asosidagi yotoqxonalarning xususiy sherikka ajratilgan tijoriy o‘rinlariga tatbiq etilmaydi.

Normativ hujjatlar

[O‘zbekiston Respublikasi Vazirlar Mahkamasining qarori, 14.08.2023-yildagi 376-son]
[O‘zbekiston Respublikasi Vazirlar Mahkamasining qarori, 29.01.2026-yildagi 35-son]