Er va xotinning umumiy mol-mulkini bo‘lish

Mol-mulkni bo‘lish asoslari

Umumiy mol-mulk:

er yoki xotindan birining talabi bilan nikoh davrida;
nikohdan ajralgandan keyin;
kreditor turmush o‘rtoqlardan birining umumiy mulkdagi ulushiga undiruv qaratishni talab qilganda bo‘linishi mumkin.

Muhim: umumiy mol-mulkni bo‘lish uchun nikohdan ajralish shart emas. Er-xotin nikoh davomida ham mol-mulkni bo‘lib olishi mumkin.

Kelishuv asosida bo‘lish

Er-xotin umumiy mol-mulkni o‘zaro kelishuv asosida bo‘lishi mumkin. Taraflarning xohishiga ko‘ra mol-mulkni bo‘lish to‘g‘risidagi kelishuv notarial tartibda tasdiqlanishi mumkin.

Kelishuvda har bir tarafga o‘tadigan mol-mulk, kompensatsiya, umumiy qarzlar va boshqa mulkiy masalalar aniq ko‘rsatiladi.

Sud tartibida bo‘lish

Nizo mavjud bo‘lsa, mol-mulk sud tomonidan bo‘linadi. Umumiy qoidaga ko‘ra, er va xotinning ulushlari teng hisoblanadi.

Sud voyaga etmagan bolalarning manfaatlari yoki turmush o‘rtoqlardan birining e’tiborga loyiq manfaatlarini hisobga olib teng ulushlar qoidasidan chekinishi mumkin.

Agar bir tarafga uning ulushidan qimmatroq mol-mulk berilsa, ikkinchi tarafga pul yoki boshqa kompensatsiya belgilanishi mumkin.

Bolalarga tegishli mol-mulk

Voyaga etmagan bolalar ehtiyoji uchun olingan kiyim-kechak, maktab va sport jihozlari, musiqa asboblari hamda boshqa buyumlar bo‘linmaydi. Ular bola qaysi ota-ona bilan yashasa, o‘sha tarafga kompensatsiyasiz beriladi.

Umumiy mablag‘ hisobidan voyaga etmagan bolalar nomiga qo‘yilgan omonatlar bolalarga tegishli bo‘lib, umumiy mulkni bo‘lishda hisobga olinmaydi.

Qarzlar va tasarruf etilgan mulk

Er-xotinning umumiy qarzlari ularga belgilangan ulushlarga mutanosib ravishda taqsimlanadi.

Agar turmush o‘rtoqlardan biri umumiy mulkni ikkinchi tarafning irodasiga zid va oila manfaatlariga mos bo‘lmagan tarzda sarflagan yoki boshqa shaxsga o‘tkazgan bo‘lsa, bo‘lish vaqtida mulkning o‘zi yoki uning qiymati hisobga olinadi.

Da’vo muddati

Nikohdan ajralgan er-xotinning umumiy mol-mulkni bo‘lish talablariga uch yillik da’vo muddati qo‘llaniladi.

Muhim: uch yillik muddat nikoh bekor qilingan kundan emas, balki shaxs o‘zining mulkiy huquqi buzilganini bilgan yoki bilishi lozim bo‘lgan kundan boshlab hisoblanadi.

Normativ hujjatlar

Maqola foydali bo‘ldimi?

Bo‘limlar