Ishlab chiqaruvchi, sotuvchi va ijrochining iste’molchi oldidagi majburiyatlari

Kafolat muddati qanday belgilanadi?

Uzoq muddat foydalaniladigan barcha turdagi tovarlar va xizmatlarga ishlab chiqaruvchi yoki ijrochi kafolat muddatini belgilashi lozim.

Kafolat muddati:

tovar iste’molchiga sotilgan yoki xizmat ko‘rsatilgan kundan boshlanadi;
sotilgan kunni aniqlash imkoni bo‘lmasa — tovar ishlab chiqarilgan kundan hisoblanadi.

Butlovchi buyumlarning kafolat muddati, agar qonunchilikda boshqacha qoida bo‘lmasa, asosiy buyum kafolat muddatidan kam bo‘lishi mumkin emas.

Kafolat muddati tovar pasportida yoki tovar bilan birga iste’molchiga beriladigan boshqa hujjatda ko‘rsatiladi.

Ta’mirlash va ehtiyot qismlarini kim ta’minlaydi?

Ishlab chiqaruvchi tovardan kafolat va xizmat muddati davomida foydalanish imkoniyatini ta’minlashi, uni ta’mirlash va texnik xizmat ko‘rsatishni tashkil etishi shart.

U tovar ishlab chiqarilayotgan davrda hamda ishlab chiqarishdan olib tashlanganidan keyin:

tovarning xizmat muddati davomida;
agar xizmat muddati belgilanmagan bo‘lsa — ishlab chiqarishdan olib tashlanganidan keyin 10 yil davomida etarli miqdorda va turda ehtiyot qismlarini ishlab chiqarishi hamda savdo va ta’mirlash tashkilotlariga etkazib berishi lozim.

Tovar qancha vaqt xavfsiz bo‘lishi kerak?

Ishlab chiqaruvchi yoki ijrochi tovar, ish yoki xizmatning xizmat yoki yaroqlilik muddati davomida xavfsiz bo‘lishini ta’minlashi shart.

Agar bunday muddat belgilanmagan bo‘lsa, xavfsizlik tovar iste’molchiga sotilgan yoki ish bajarilgan paytdan boshlab 10 yil davomida ta’minlanishi lozim.

Dori vositalari, tibbiy buyumlar, oziq-ovqat va maishiy kimyo tovarlarida ishlab chiqarish sanasi, yaroqlilik muddati va saqlash shartlari ko‘rsatilishi shart. Yaroqlilik muddati o‘tgan yoki belgilanmagan tovarlarni sotish taqiqlanadi.

Tovar nuqsoni zarar etkazsa kim javob beradi?

Tovar, ish yoki xizmat nuqsoni tufayli iste’molchining hayoti, sog‘lig‘i yoki mol-mulkiga etkazilgan zarar sotuvchi, ishlab chiqaruvchi yoki ijrochi tomonidan qoplanishi lozim.

2026-yil 19-yanvardan, agar hayot yoki sog‘liqqa zarar muvofiqlikni baholash qoidalarining buzilishi natijasida etkazilgan bo‘lsa, muvofiqlikni baholash organi ham sotuvchi, ishlab chiqaruvchi yoki ijrochi bilan birga solidar javobgar bo‘ladi.

Zararni qoplashni hatto sotuvchi yoki ishlab chiqaruvchi bilan bevosita shartnoma tuzmagan iste’molchi ham talab qilishi mumkin.

Eslatma: xavfli tovar qaytarib olinishi e’lon qilingan bo‘lsa, iste’molchi undan foydalanishni to‘xtatishi lozim. Tovarni qaytarib olish bilan bog‘liq holda iste’molchiga etkazilgan zarar qonunda belgilangan tartibda qoplanadi.

Normativ hujjatlar

O‘zbekiston Respublikasining «Iste’molchilarning huquqlarini himoya qilish to‘g‘risida»gi Qonuni, 26.04.1996-yildagi 221-I-son

Maqola foydali bo‘ldimi?

Bo‘limlar