Rieltorlik faoliyati

2026-yil 7-noyabrgacha amal qiladigan tartib

Rieltorlik faoliyati — yuridik va jismoniy shaxslarga ko‘chmas mulk ob’ektlari hamda ularga bo‘lgan huquqlarga doir bitimlar tuzish bilan bog‘liq xizmatlarni shartnoma asosida ko‘rsatishga qaratilgan tadbirkorlik faoliyati.

Rieltorlik xizmatlarining asosiy turlari:

ko‘chmas mulkka va unga bo‘lgan huquqlarga doir bitimlarni tuzishda vositachilik;
ko‘chmas mulk va unga bo‘lgan huquqlar savdosini tashkil etish;
ko‘chmas mulkni ishonchli boshqarish;
ko‘chmas mulk bozorida axborot va maslahat xizmatlarini ko‘rsatish.

Rieltorlik tashkilotida malaka sertifikatiga ega bo‘lgan kamida ikki nafar xodim, shu jumladan tashkilot rahbari bo‘lishi kerak. Tashkilotning fuqarolik javobgarligi sug‘urta qilingan bo‘lishi shart.

Yakka tartibda faoliyat yurituvchi rieltor yakka tartibdagi tadbirkor maqomiga, rieltorning malaka sertifikatiga va fuqarolik javobgarligini sug‘urta qilish polisiga ega bo‘lishi kerak.

Rieltorlik xizmatlari shartnomasi

Rieltorlik xizmati buyurtmachi bilan yozma shartnoma asosida ko‘rsatiladi. Shartnomada kamida quyidagilar ko‘rsatilishi lozim:

ko‘rsatiladigan xizmatlarning mazmuni;
shartnomaning amal qilish muddati;
xizmat narxi va hisob-kitob qilish tartibi;
taraflarning huquq va majburiyatlari;
javobgarlik choralari;
shartnomani o‘zgartirish va bekor qilish shartlari.

Xizmat bajarilgandan keyin uning bajarilganligini tasdiqlovchi dalolatnoma yoki boshqa hujjat tuziladi. Rieltor xizmatga bevosita taalluqli hujjatlarni buyurtmachiga topshirishi kerak.

Buyurtmachining huquqlari

Buyurtmachi rieltorlik tashkiloti yoki rieltordan:

malaka sertifikati va sug‘urta polisini ko‘rsatishni;
shartnomaning bajarilishi haqida axborot berishni;
tuzilishi rejalashtirilayotgan bitimning xususiyati va huquqiy oqibatlari haqida yozma tushuntirish berishni;
shartnoma rieltorning aybi bilan bekor qilinganda etkazilgan zararni qoplashni talab qilishga haqli.

Rieltorga pul yoki hujjat topshirishdan oldin uning malaka sertifikati, sug‘urta polisi va yozma shartnomadagi vakolatlarini tekshirish lozim.

2026-yil 8-noyabrdan kuchga kiradigan tartib

2026-yil 8-noyabrdan 2010-yilgi Qonun o‘z kuchini yo‘qotadi va yangi «Rieltorlik faoliyati to‘g‘risida»gi Qonun amal qila boshlaydi.

Yangi tartibga ko‘ra:

rieltorlar, rieltorlik tashkilotlari, ko‘chmas mulk bo‘yicha agentlar va professional jamoat birlashmalari haqidagi ma’lumotlar Yagona reestrda yuritiladi;
rieltorlik tashkiloti va ko‘chmas mulk bo‘yicha agent o‘z ma’lumotlari Yagona reestrga kiritilgan kundan faoliyat yuritish huquqiga ega bo‘ladi;
rieltor faqat rieltorlik tashkiloti tarkibida va malaka sertifikati asosida ishlaydi;
rieltorlik tashkiloti professional jamoat birlashmalaridan biriga a’zo, fuqarolik javobgarligi sug‘urtalangan va shtatida sertifikatga ega kamida ikki nafar xodim bo‘lishi kerak;
ko‘chmas mulk bo‘yicha agent yakka tartibdagi tadbirkor yoki o‘zini o‘zi band qilgan shaxs sifatida ro‘yxatdan o‘tishi, Yagona reestrga kiritilishi va sug‘urta polisiga ega bo‘lishi kerak.

Rieltorlik tashkiloti vositachilik, savdoni tashkil etish, ishonchli boshqarish hamda axborot, maslahat va reklama xizmatlarini ko‘rsatishi mumkin. Ko‘chmas mulk bo‘yicha agent esa faqat axborot, maslahat va reklama xizmatlarini ko‘rsatadi.

2026-yil 8-noyabrdan keyin buyurtmachi xizmat ko‘rsatuvchining Yagona reestrga kiritilganligi, malaka sertifikati, professional jamoat birlashmasiga a’zoligi va sug‘urta polisini tekshirishga haqli bo‘ladi.