Internet orqali tovar sotib olish qoidalari

Onlayn shartnoma qachon tuzilgan hisoblanadi?

Elektron tijoratda shartnoma elektron hujjat, elektron xabar yoki xaridorning oferta shartlarini bajarishga qaratilgan harakati orqali tuzilishi mumkin.

Sotuvchining taklifi — oferta, xaridorning unga roziligi esa aktsept hisoblanadi. Aktsept sotuvchiga etib kelgan paytdan shartnoma tuzilgan deb hisoblanadi.

Sotuvchi o‘zi haqida nimani ko‘rsatishi kerak?

Onlayn sotuvchi xaridorga o‘zi haqida ishonchli ma’lumot berishi shart. Jumladan:

nomi yoki YaTTning F.I.O.;
joylashgan manzili;
aloqa vositalari;
tovar, ish yoki xizmat haqida ma’lumot;
narxi;
to‘lov va etkazib berish shartlari;
kafolat shartlari;
tovarni qaytarish va shartnomani bekor qilish tartibi xaridor uchun tushunarli bo‘lishi kerak.

Axborot tizimi orqali iste’molchiga tovar sotishda «Iste’molchilarning huquqlarini himoya qilish to‘g‘risida»gi Qonunda belgilangan qo‘shimcha axborot talablari ham bajarilishi shart.

Etkazilgan tovar tavsifga mos kelmasa nima qilish mumkin?

Onlayn sotuvchi xaridor buyurtma qilgan namuna yoki tavsifga mos tovarni etkazishi shart.

Tovar e’lon, rasm, tavsif yoki buyurtma parametrlariga mos kelmasa, iste’molchi qonunchilikda belgilangan tartibda:

tovarni almashtirish;
shartnomani bekor qilish;
pulni qaytarish;
etkazilgan zararni qoplash kabi talablarni qo‘yishi mumkin.

Noto‘g‘ri yoki etarli bo‘lmagan ma’lumot sababli kerakli xususiyatlarga ega bo‘lmagan tovar sotib olingan bo‘lsa ham shartnomani bekor qilish va zararni qoplash huquqi mavjud.

Onlayn xarid bo‘yicha dalillarni saqlash kerakmi?

Ha. Nizo yuzaga kelganda:

elektron buyurtma;
oferta va shartlar;
tovar tavsifi va reklama skrinshotlari;
elektron chek;
bank yoki to‘lov tizimi ma’lumoti;
sotuvchi bilan yozishmalar;
etkazib berish hujjatlari muhim dalil bo‘lishi mumkin.

Elektron hujjat va xabarlar elektron tijoratda shartnoma munosabatlarini tasdiqlash uchun huquqiy ahamiyatga ega.

Sotuvchi tovarni yubormasa yoki majburiyatni bajarmasa-chi?

Sotuvchi shartnomada belgilangan muddat va shartlarga muvofiq tovarni etkazishi shart.

Majburiyat bajarilmasa yoki tovar shartnomaga mos bo‘lmasa, xaridor sotuvchiga talab qo‘yishi, zarur hollarda Raqobatni rivojlantirish va iste’molchilar huquqlarini himoya qilish qo‘mitasiga yoki sudga murojaat qilishi mumkin.

Eslatma: onlayn savdoda buyurtma berishdan oldin sotuvchining ma’lumotlari, yakuniy narx, etkazib berish haqi, qaytarish va kafolat shartlarini saqlab qo‘yish nizo yuzaga kelganda muhim ahamiyatga ega.

Normativ hujjatlar

Maqola foydali bo‘ldimi?

Bo‘limlar