Xotin-qizlar bandligiga qaratilgan ijtimoiy loyihalar uchun grant

Xotin-qizlarga tadbirkorlik qilishi

Grant nima uchun beriladi?

Ijtimoiy loyiha granti — xotin-qizlarni doimiy ish bilan ta’minlash yoki ularning tadbirkorlik, sport, san’at va madaniyat sohasidagi ijtimoiy faolligini oshirishga qaratilgan loyihani moliyalashtirish uchun ajratiladigan qaytarilmaydigan yordam.

Grant «Ayollar daftari» jamg‘armasi hisobidan BHMning 60 baravarigacha miqdorda beriladi.

Kimlar grant olishi mumkin?

Grant uchun:

jismoniy shaxslar;
nodavlat tashkilotlar ariza berishi mumkin.

Loyiha tegishli mahallada yashovchi Ijtimoiy reestrga kiritilgan oilalarning kamida 3 nafar xotin-qizini ish bilan ta’minlash yoki ijtimoiy faolligini oshirishga qaratilgan bo‘lishi kerak.

Qanday hujjatlar taqdim etiladi?

Ariza beruvchi:

rejalashtirilayotgan ijtimoiy loyiha haqida ma’lumot;
loyihani amalga oshirishdan kutilayotgan natijalar;
zarur mablag‘lar hisob-kitobi — smetani taqdim etadi.

Loyihada yaratiladigan ish o‘rinlari, ish haqi, ish sharoiti, sotuv bozori, mavjud tajriba va xodimlarni kasbga o‘qitish imkoniyatini aniq ko‘rsatish maqsadga muvofiq.

Grant qanday shaklda beriladi?

Jismoniy shaxsga grant mablag‘i naqd pulda berilmaydi. Loyihani amalga oshirish uchun zarur:

asbob-uskuna;
jihoz;
xomashyo;
xizmatlar belgilangan tartibda xarid qilib beriladi.

Nodavlat tashkilotga mablag‘ shartnoma asosida ish o‘rni yaratish, ishlab chiqarish yoki xizmat ko‘rsatishni kengaytirish, xomashyo xarid qilish va xodimlarni o‘qitish uchun uning bank hisobvarag‘iga o‘tkaziladi.

Loyiha qanday tanlanadi?

Loyihalar har yili yanvarь oyi oxiriga qadar mahalladagi xotin-qizlar faoliga taqdim etiladi. «Mahalla ettiligi» ularni 20 fevralga qadar ko‘rib chiqib, eng yaxshi 3 ta loyihani tuman yoki shahar komissiyasiga kiritadi.

Komissiya mahalla kesimida bitta g‘olib loyihani tanlaydi. G‘oliblar har yili 8-martga qadar e’lon qilinadi, grantdan bir yilda bir marta foydalanish mumkin.

Loyiha qanday mezonlar bo‘yicha baholanadi?

Baholashda:

doimiy ish o‘rinlari yaratilishi;
loyihaning mahalla ixtisoslashuviga mosligi;
bozorbopligi va daromadliligi;
ariza beruvchining tajribasi;
zarur resurs va jihozlarning mavjudligi;
munosib ish sharoiti va ish haqi;
malakasi etarli bo‘lmagan xotin-qizlarni o‘qitish imkoniyati hisobga olinadi.

Mehnat migratsiyasidan qaytgan, nogironligi bo‘lgan, norasmiy mehnat qilayotgan, tazyiq yoki zo‘ravonlikdan jabr ko‘rgan, ishsiz bitiruvchi va boshqa ijtimoiy ehtiyojmand xotin-qizlarni qamrab olgan loyihalarga alohida e’tibor qaratiladi.