Tazyiq va zo‘ravonlikdan jabrlangan shaxslarga ijtimoiy xizmatlar ko‘rsatish

Qaerga murojaat qilish mumkin

Prezidentning 2024-yil 10-maydagi PQ-175-son qarori va Vazirlar Mahkamasining 2024-yil 25-iyundagi 354-son qarori asosida tazyiq va zo‘ravonlikdan jabrlangan xotin-qizlarga kompleks ijtimoiy xizmatlar ko‘rsatiladi.

Murojaat qilish mumkin:

ichki ishlar organlarining 102 qisqa raqamiga;
profilaktika inspektoriga;
112 yagona dispetcherlik xizmatiga;
1146 qisqa raqamli ishonch telefoniga;
«Inson» ijtimoiy xizmatlar markaziga.

Murojaatni jabrlangan shaxsning o‘zi, boshqa jismoniy yoki yuridik shaxslar, ijtimoiy xodim yoki patronaj hamshira ham berishi mumkin.

«Inson» markazining ijtimoiy, psixologik va yuridik xizmatlaridan foydalanish uchun himoya orderi talab etilmaydi.

Zo‘ravonlik haqida xabar bergan uchinchi shaxsga doir ma’lumotlar sir saqlanishi shart.

Murojaatdan keyingi choralar

Murojaat ichki ishlar organlarida ro‘yxatga olinadi va profilaktika inspektoriga darhol yuboriladi.

Profilaktika inspektori 24 soat ichida:

himoya orderini rasmiylashtirish choralarini ko‘radi;
zarurat bo‘lsa, birlamchi ko‘mak xonasiga joylashtirish dalolatnomasini rasmiylashtiradi;
zo‘ravonlik sodir etgan shaxs bilan suhbat o‘tkazadi;
jabrlangan shaxsning ijtimoiy, psixologik va huquqiy xizmatlarga ehtiyojini aniqlaydi.

Ijtimoiy xodim shaxs va uning voyaga etmagan farzandlari holatini bir ish kuni ichida dastlabki baholaydi.

Ko‘rsatiladigan xizmatlar

«Inson» markazlari quyidagi xizmatlarni ko‘rsatadi:

psixologik yordam;
shoshilinch tibbiy yordam olishga ko‘maklashish;
huquqiy xizmatlar;
himoya orderini olishda ko‘maklashish;
yo‘qotilgan hujjatlarni tiklashga ko‘maklashish;
boshqa davlat xizmatlaridan foydalanishga yordam berish;
kasb-hunarga o‘qitish uchun yo‘llanma berish.

Vaqtincha joylashtirish va reabilitatsiya

Xotin-qizlar va ularning voyaga etmagan farzandlari shoshilinch qabul bo‘limi mavjud shifoxonalardagi birlamchi ko‘mak xonalariga uch sutkagacha joylashtirilishi mumkin. Bu erda tibbiy yordam, psixiatr ko‘rigi, ovqat va shaxsiy gigiena vositalari ta’minlanadi.

Chuqurlashtirilgan reabilitatsiya zarur bo‘lsa, shaxsning roziligi va belgilangan tartib asosida hududiy reabilitatsiya markaziga joylashtiriladi. U erda tibbiy, psixologik, ijtimoiy va huquqiy xizmatlardan iborat yakka tartibdagi reabilitatsiya dasturi ishlab chiqiladi.

Barcha xizmatlar shaxsning roziligi, xavfsizligi va shaxsga doir ma’lumotlarning maxfiyligi ta’minlangan holda ko‘rsatilishi kerak.

Xizmatlardan foydalangan shaxsning ijtimoiylashuv holati zaruratga ko‘ra olti oy davomida monitoring qilinadi.

Maqola foydali bo‘ldimi?

Bo‘limlar